ەۋرووداق تۇركىمەنستان گازىن ساتىپ الۋعا مۇددەلى

ەۋرووداق تۇركىمەنستان گازىن ساتىپ الۋعا مۇددەلى.

جاقىندا ۆيتسە-پرەمەر م. مەرەدوۆ باستاعان تۇكىمەنستان دەلەگاتسياسى بريۋسسەلگە رەسمي ىسساپارمەن باردى. وندا ولار ەۋروكوميسسيا توراعاسىنىڭ ەنەرگەتيكا ماسەلەلەرى بويىنشا ورىنباسارى ماروش شەۆچوۆيچپەن كەزدەسۋ وتكىزدى. كەزدەسۋ بارىسىندا قوس تاراپ ەۋروپا مەن تۇركىمەنستاندى بايلانىستىراتىن ترانسكاسپي گاز قۇبىرى جوباسىن، كاسپيدى دامىتۋ كورپوراتسياسىنىڭ جۇمىسىن ودان ارى دامىتۋ جونىندە كەلىسسوزدەر جۇرگىزدى.

رەسمي اشحاباد تاراتقان اقپارات بويىنشا، ەۋرووداق وكىلدەرى تۇركىمەنستان گازىن ساتىپ الۋعا مۇددەلى جانە ترانسكاسپي جوباسىنا ينۆەستيتسيا تارتۋعا دايىن.

ۇزاق جىلداردان بەرى داۋ تۋعىزىپ كەلگەن تۇركىمەنستاننىڭ ترانسكاسپي جوباسى بيىل اقتاۋ قالاسىندا وتكەن كاسپي جاعالاۋى ەلدەرىنىڭ سامميتىندە شەشىمىن تاپقان. كاسپي تەڭىزىنە ەرەكشە قۇقىقتىق مارتەبە بەرەتىن كونۆەنتسيانىڭ قابىلدانۋى رەسمي اشحابادتىڭ ەۋروپاعا گاز تاسىمالداۋىنا مۇمكىندىك بەرگەن.

ترانسكاپي جوباسى بويىنشا، تۇركىمەنستان 30 جىل بويى جىلىنا 30 ميلليارد كۋبمەتر گاز تاسىمالدايدى. بۇل اشحاباد ءۇشىن ۇلكەن ەكونوميكالىق جوبا.

وسى ۋاقىتقا دەيىن ەۋروپا نارىعىن "اشسا الاقانىندا، جۇمىس جۇدىرىعىندا" ۇستاپ كەلگەن رەسەيگە تۇركىمەنستان قانشالىقتى باسەكەلەس بولادى ول جاعى ازىرگە بەلگىسىز. بىراق قازىردىڭ وزىندە حالىقارالىق ساراپشىلار تۇركىمەن گازىنىڭ ەۋروپادا ۇلكەن سۇرانىسقا يە بولاتىنىن جانە ەۋرووداق ەلدەرىنىڭ رەسەيدىڭ گاز ىقپالىنان شىعۋ ءۇشىن اشحابادتىڭ دەموكراتيالىق قۇندىلىقتارعا ساي كەلمەيتىن بىرقاتار ارەكەتتەرىنە كوز جۇما قارايتىنىن تىلگە تيەك ەتۋدە. ءبىر سوزبەن ايتقاندا ەگەر ترانسكاسپي جوباسى ىسكە قوسىلاتىن بولسا، وندا ەل پرەزيدەنتى قۇربانعۇلى بەردىمۇحامەدوۆ پەن ونىڭ جاقتاستارى تابيعي گازدىڭ ارقاسىندا كەم دەگەندە "30 جىل الاڭسىز ءومىر سۇرەدى".

"The Qazaq Times"