"التىن ءونىم" وڭىرلىك باعدارلاماسىنىڭ تانىستىرىلىمى فوتو: QazaqTimes

بۇگىن قازاق ۇلتتىق اگرارلىق ۋنيۆەرسيتەتىنىڭ كىشى زالىندا ازىق-تۇلىك ءوندىرىسى سالاسىندا شاعىن جانە ورتا كاسىپكەرلىكتى قارجىلاندىرۋ جونىندەگى «التىن ءونىم» وڭىرلىك باعدارلاماسىنىڭ تانىستىرىلىمى ءوتتى.

باعدارلاماعا ساي، قالا اۋماعىندا ازىق-تۇلىك ءوندىرىسىنىڭ باسىمدىق بەرىلگەن سالالارىندا جۇمىس ىستەيتىن شاعىن جانە ورتا كاسىپكەرلىك سۋبەكتىلەرىن قولداۋ مەن دامىتۋ ماقساتىندا 100 ملن تەڭگەگە دەيىن (1 جوباعا)  7 جىلدىق مەرزىمگە نەسيەلەۋ باستالادى.

كونفەرەنتسيانى قازاق ۇلتتىق اگرارلىق ۋنيۆەرسيتەتىنىڭ ءبىرىنشى پرورەكتورى تىرەۋوۆ قانات ماراتۇلى  اشىپ، ەندى قازاقستان ازاماتتارى  اۋىلدا دا، قالادا دا ءوز بيزنەسىن جۇرگىزۋ ءۇشىن 16 ميلليون تەڭگەگە دەيىن  شاعىن نەسيە الا الاتىندىعىن جەكىزدى. سونداي-اق، جيىنعا الماتى قالالىق اۋىل شارۋاشىلىعى جانە ۆەتەريناريا باسقارماسىنىڭ جەتەكشىسى كەرىمبەكوۆ ايدىن جانۇزاقۇلى، «دامۋ» كاسىپكەرلىكتى دامىتۋ قورى» ديرەكتورىنىڭ ورىنباسارى مارعۇلان ەدىگە ساۋلەبەكۇلى باستاعان ىشكى جانە ورتا بيزنەستىڭ باسشىلارى مەن وكىلدەرى قاتىستى.

فوتو: QazaqTimes

«التىن ءونىم» باعدارلاماسى الماتى قالاسىنىڭ اكىمدىگى مەن «دامۋ» كاسىپكەرلىكتى دامىتۋ قورى» اق-نىڭ قولداۋىمەن ازىرلەنگەن. ياعني، جالپى قارجىلاندىرۋدىڭ قۇنى 1 ملرد تەڭگە. ونىڭ 500 ميلليونى الماتى قالالىق اكىمشىلىك تاراپىنان بولىنسە، قالعان 500 ميلليونىن «دامۋ» كاسىپكەرلىكتى دامىتۋ قورى بولمەك.  نەسيەنىڭ سىياقى ستاۆكاسى جىلىنا 8,5 پايىزدان اسپايدى جانە 18 ايعا دەيىن جەڭىلدىك كەزەڭى ۇسىنىلادى.

زارينا كارمەن، «دامۋ» كاسىپكەرلىكتى دامىتۋ قورىنىڭ ايماقتىق فيليالىنىڭ باس مەنەدجەرى. فوتو: QazaqTimes

زارينا كارمەن، «دامۋ» كاسىپكەرلىكتى دامىتۋ قورىنىڭ ايماقتىق فيليالىنىڭ باس مەنەدجەرى:   «باعدارلامانىڭ ماقساتى: الماتى قالاسىنداعى كاسىپكەرلەرگە قولداۋ كورسەتۋ. نەسيەنى الماتى قالاسىندا تىركەلگەن جانە جۇمىس جاساپ جاتقان كاسىپكەر، اينالىمداعى كاپيتالدى قارجىلاندىرۋ ءۇشىن نەمەسە ءوزىنىڭ كاسىپكەرلىگىن كەڭەيتۋ ءۇشىن الۋىنا بولادى. سونداي-اق، نەسيە بەرىلمەيتىن جاعدايلار بار. مىسالى، ەسكى قارىزدى قايتارۋ ءۇشىن قايتا نەسيە الۋعا رۇقسات ەتىلمەيدى. ال جالپى نەسيەنى كەز كەلگەن  كاسىپكەر، ءتىپتى كاسىپكەرلىككە جاڭا قادام باسىپ كەلەتىن تۇلعالار الا الادى».            

فوتو: QazaqTimes

قارجىلاندىرۋ مەحانيزمى تومەندەگىدەي جۇزەگە اسادى:

بىرىنشىدەن، كاسىپكەر (كاسىپكەرلىككە ەندى كەلىپ جاتقان بولسا دا) بانككە نەسيە الۋعا ءوتىنىش بىلدىرەدى. ودان كەيىن، ەكىنشى دەڭگەيلى بانك ونىڭ ءوتىنىشىن قاراپ، اتالمىش شاعىن جانە ونەركاسىپ سۋبەكتىسىن قارجىلاندىرۋدىڭ مۇمكىندىكتەرىن انىقتايدى. ۇشىنشىدەن، ءوتىنىش قابىلدانعان جاعدايدا، بانك پروەكتىنى «الماتى قالاسىنىڭ ىسكەرلىك جانە يندۋستريالىق-يننوۆاتسيالىق دامۋ باسقارماسىنا» جىبەرەدى. باسقارما جوبانى قابىلداعان كۇننەن باستاپ 3 ء(ۇش) جۇمىس كۇنىندە قاراپ شىعادى. جانە ءتورتىنشى، ءۇشىنشى پۋنكتىدەگى باسقارما ماقۇلداعان جاعدايدا  اتالمىش جوبا قارجىلاندىرىلادى.

ايتا كەتەيىك، «التىن ءونىم» وڭىرلىك باعدارلاماسىنىڭ سەرىكتەستەرى:   «كازكوممەرتسبانك» اق  جانە «حالىق بانك» اق.

«The Qazaq Times»