ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتى، باسپاگەرلىك، رەداكتورلىق جانە ديزاينەرلىك ونەر كافەدراسىنىڭ ۇيىمداستىرۋىمەن 10.10.2018 كۇنى جۋرناليستيكا فاكۋلتەتىندە جۇمىس بەرۋشى مەكەمە باسشىلارىمەن  كەزدەسۋ ءوتتى.

دوڭگەلەك ۇستەلگە، «اننۇر ساپا» باسپاسىنىڭ ديرەكتورى ەرماحان شايحى، «بالالار ادەبيەتى» باسپاسىنىڭ ديرەكتورى شايزادا بايكەنوۆا، «The Qazaq Times» اقپاراتتىق-قوعامدىق ساياسي پورتالىنىڭ باس رەداكتورى مۇباراك قويشىبەك، جشس «قازاق گازەتتەرى» رەداكتورىنىڭ ورىنباسارى ءلاززات نوعايباەۆا، «كوركەم» باسپاسىنىڭ ديرەكتورى سەرىكباي بەيسەن، جۋرناليستيكا فاكۋلتەتىنىڭ جۇمىس بەرۋشىلەر كەڭەسىنىڭ توراعاسى سەرىك جۇمابەكۇلى، «ءال-فارابي» ترك ديرەكتورى داۋرەن مۇحامەدجانوۆ، جۋرناليستيكا فاكۋلتەتىنىڭ دەكانى ساعاتبەك مەدەۋبەكۇلى، باسپاگەرلىك، رەداكتورلىق جانە ديزاينەرلىك ونەر كافەدراسىنىڭ مەڭگەرۋشىسى ايگۇل رامازان جانە وقىتۋشى-پروفەسسورلار قۇرامى قاتىستى.

دوڭگەلەك ۇستەلدىڭ ماقساتى - «ديزاين» جانە «باسپا ءىسى» ماماندىعى ستۋدەنتتەرىنىڭ تەوريالىق بىلىمدەرىن تاجىريبەلىك ساباقتارمەن ۇشتاستىرۋ. ناتيجەسىندە، ساۋاتتى دا كاسىبي مامان دايارلاۋ.

جيىندا، «بالالار ادەبيەتى» باسپاسىنىڭ ديرەكتورى شايزادا بايكەنوۆا دۋالدى وقىتۋ جۇيەسىن ۇسىنسا، «The Qazaq Times» اقپاراتتىق-قوعامدىق ساياسي پورتالىنىڭ باس رەداكتورى مۇباراك قويشىبەك، وقۋ باعدارلاماسىنا «قازاق ءتىلى گرامماتيكاسىن» ەنگىزىلسىن دەگەن پىكىرىن ايتتى.

وسى ورايدا ءسوز العان جۇمىس بەرۋشىلەر كەڭەسىنىڭ توراعاسى سەرىك جۇمابەكۇلى جۇمىس بەرۋشى مەكەمەنىڭ مىندەتى، ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ مىندەتى جانە ستۋدەنتتىڭ مىندەتتەرى جۇكتەلگەن ءۇش جاقتى كەلىسىم-شارت ۇسىندى.

«اننۇر ساپا» باسپاسىنىڭ ديرەكتورى ەرماحان شايحى: «جۇمىلا كوتەرگەن جۇك جەڭىل دەمەكشى، كىتاپتى ساپالى شىعارۋ ۇجىمدىق جۇمىس، ال بۇكىل ۇجىم بولىپ بولاشاق باسپاگەرلەر مەن ديزاينەرلەردى دايىندايتىن بولساق، ساپالى دا ساۋاتتى باسىلىمدارىمىز كوبەيەر ەدى، سوندىقتان بۇل كەلىسىم-شارتتى العا قويىپ قىزمەت ىستەيىك»،- دەگەن كەلىسىمىن ءبىلدىردى.

شامامەن ەكى ساعاتقا سوزىلعان دوڭگەلەك ۇستەلدى قورىتىندىلاۋ بارىسىندا مىنانداي پىكىرلەر ايتىلدى.

  • نەگىزگى وقۋ باعدالاماسىن، وقىتۋ جوسپارىن جۇمىس بەرۋشى ماماندارمەن كەلىسە وتىرىپ وزگەرتۋ;
  • تەوريالىق ساباقتار مەن تاجىريبەلىك ساباقتاردى ۇشتاستىرا وتىرىپ ستۋدەنتتىڭ كاسىبيلىگىن ارتتىرۋ.

تىلەپبەرگەن اقمولدىر

جۋرناليستيكا فاكۋلتەتىنىڭ PhD دوكتورانتى

"The Qazaq Times"