قالمۇحانبەت قاسىموۆ: ءىىم قاتىستى ايتىلىپ جاتقان سىنداردىڭ بارلىعى ورىندى

قوعام تاراپىنان ءىىم قاتىستى ايتىلىپ جاتقان سىنداردىڭ بارلىعى ورىندى – دەپ مالىمدەدى ىشكى ىستەر ءمينيسترى قالمۇحانبەت قاسىموۆ.

«وكىنىشكە وراي سوڭعى ۋاقىتتارى ءىىم، ونىڭ ىشىندە پوليتسيا قىزمەتكەرلەرى ءجيى سىنعا الىنۋدا. قوعام تاراپىنان ايتىلىپ جاتقان سىنداردىڭ بارلىعى ورىندى. شىنىندا دا پوليتسيا جۇمىسىندا شەشىلمەگەن ماسەلەلەر وتە كوپ. قازىر ءبىز وسى پروبلەمالاردى شەشۋ جولىندا جۇمىس ىستەپ جاتىرمىز جانە ونى حالىقتان جاسىرىپ وتىرعان جوقپىز. باق بەتتەرىندە جارىق كورىپ جاتقان سىني ماتەريالدارعا مانيتورينگ جۇرگىزىپ، سول بويىنشا زاڭ بۇزۋشىلىقتاردى انىقتاپ، كەرەك بولعان جاعدايدا ءتيىستى ادامداردى جۇمىستان قۋعا دەيىنگى شارالاردى ورىندايمىز» - دەدى جۋرناليستەرمەن وتكەن ارنايى ءباسپاسوز ءماسليحاتىندا قالمۇحانبەت قاسىموۆ.

ەستەرىڭىزگە سالايىق، تامىز ايىنىڭ 19-ى كۇنى الماتى قالاسىندا وليمپيادا ويىندارىنىڭ جۇلدەگەرى، مانەرلەپ سىرعاناۋشى دەنيس تەننىڭ ولىمىنەن كەيىن ءىىم ۇلكەن داۋعا ىلىككەن. ازاماتتىق بەلسەندىلەر مەن جۋرناليستەر ىشكى ىستەر ءمينيسترى قالمۇحانبەت قاسىموۆتىڭ وستاۆكاعا كەتۋىن تالاپ ەتىپ، ۆەدومستۆانىڭ وزىنە تۇبەگەيلى رەفورما قاجەت دەگەن. وسىدان كەيىن كوپ ۇزاماي پرەزيدەنت نۇرسۇلتان نازارباەۆ ءىىم مودەرنيزاتسيادان وتكىزۋ قاجەت دەپ، ارنايى قۇجاتقا قول قويعان.

"The Qazaq Times"