تۇركىمەن گازى ەۋروپاعا جەتە مە؟

ترانسكاسپي گاز قۇبىرى تۇركىمەنستاننىڭ ەكونوميكالىق پروبلەمالارىن شەشە الا ما؟

تامىز ايىنىڭ 12-ءى كۇنى اقتاۋ قالاسىندا كاسپي جاعالاۋى ەلدەرىنىڭ V ءسامميتى ءوتتى. وندا قازاقستان، ءازىربايجان، تۇركىمەنستان، رەسەي جانە يران ەلدەرىنىڭ باسشىلارى كاسپي تەڭىزىنە ارنايى قۇقىقتىق مارتەبە بەرەتىن كونۆەنتسياعا قول قويدى. جاڭادان قابىلدانعان قۇجات بويىنشا، ۇزاق جىلداردان بەرى شەشىمىن تاپپاي كەلە جاتقان تۇركىمەنستان بيلىگىنىڭ ترانسكاپي گاز قۇبىرى جوباسىنىڭ كۇرمەۋى اعىتىلدى. بۇدان بىلاي رەسمي اشحاباد ەۋروپاعا گاز تاسىمالداۋ ءۇشىن ترانسكاسپي گاز قۇبىرى وتەتىن ازىربايجانمەن عانا كەلىسسوزدەر جۇرگىزەدى.

ترانسكاسپي گاز قۇبىرىنىڭ ىسكە قوسىلۋى ستاگناتسيالىق كەزەڭدى باستان وتكىزىپ جاتقان تۇركىمەنستان ەكونوميكاسىنا قانشالىقتى كومەكتەسەدى؟

شەتەلدىك ساراپشىلار پىكىرىنشە، ۇزاق جىلداردان بەرى ۇلكەن داۋ بولىپ كەلە جاتقان ترانسكاسپي گاز قۇبىرىنىڭ ىسكە قوسىلۋى تۇركىمەنستان ەكونوميكاسىنا اناۋ ايتقانداي كومەكتەسپەيدى. سەبەبى تۇركىمەنستان ەكونوميكاسىنا قارجىلاي كومەك بۇگىن ەمەس، ەرتەڭ ەمەس، كەشە قاجەت بولعان. رەسمي اشحاباد بۇل تۇرعىدا ءوزىنىڭ التىن ۋاقىتىن الدىعا وزدىرىپ الدى جانە ونى قۋىپ جەتۋ تۇركىمەنباسى بيلىگىنە وڭايعا سوقپايدى. ونىڭ ۇستىنە تۇركىمەنستاندا ءدال قازىر ترانسكاسپي گاز قۇبىرىن سالاتىن قارجى جوق. ول قارجىنى تابۋ ءۇشىن رەسمي اشحابادتىڭ شەتەلدىك ينۆەستورلارعا جۇگىنۋىنە تۋرا كەلەدى. ال ولار ەشۋاقىتتا تەگىن جۇمىس ىستەمەيدى.

تۇركىمەن گازى ەۋروپاعا جەتە مە؟

قارجى تاۋىپ قۇبىر سالعاننان بولەك، سول قۇبىردى گازبەن تولتىرۋ دەگەن ماسەلە بار. بۇل تۇستا تۇركىمەنستان گازىنىڭ ەۋروپاعا جەتۋ-جەتپەۋى ۇلكەن سۇراق. سەبەبى بىلتىرعى جىلى تۇركىمەنستان قىتايعا كەلىسىلگەن گاز مولشەرىن تولىقتاي جەتكىزگەن جوق. وسىدان كەيىن قىتاي تاراپى تۇركىمەنستاننان قىتايعا گاز تاسىمالدايتىن ءتورتىنشى گاز قۇبىرى تورابىن ىسكە قوسقان جوق. ىسكە قوسۋ بىلاي تۇرسىن 2017 جىلى پايدالانۋعا بەرىلۋى ءتيىس گاز قۇبىرىنىڭ قۇرىلىسى ءالى كۇنگە دەيىن باستالعان جوق.

"The Qazaq Times"