اۆستريانىڭ الپباحىندا ۇكىمەت باسىنداعى جانە بۇرىنعى مەملەكەت، ۇكىمەت باسشىلارى، حالىقارالىق ۇيىمدار مەن باق وكىلدەرىنىڭ قاتىسۋىمەن جوعارعى دەڭگەيدەگى جىل سايىنعى بەدەلدى ساياسي فورۋم بولىپ ءوتتى. ەۋروپالىق جانە جاھاندىق ماسەلەلەردىڭ شەشىمىن تابۋعا ارنالعان بۇل شارا ءوز الاڭىندا الەمنىڭ 100 مەملەكەتىنەن كەلگەن 5 مىڭ قاتىسۋشىلاردىڭ باسىن قوستى.

اۆستريانىڭ پرەزيدەنتى الەكساندر ۆان دەر بەللەن، بۇۇ-نىڭ سەگىزىنشى باس حاتشىسى پان گي مۋن، اۆستريانىڭ بۇرىنعى پرەزيدەنتى حاينتس فيشەر، سەربيانىڭ پرەمەر-ءمينيسترى الەكساندر ۆۋچيچ جانە تاعى باسقالار سيمپوزيۋمنىڭ باستى سپيكەرلەرى بولىپ تابىلدى جانە ولار عالامدىق تەكتونيكالىق ساياسي-ەكونوميكالىق وزگەرىستەر كونتەكسىندە فورۋمنىڭ وزەكتىلىگىن اتاپ ءوتتى.

ءال-فارابي اتىنداعى قازۇۋ جانە جاقىندا ونىڭ جانىندا قۇرىلعان پان گي مۋن اتىنداعى تۇراقتى دامۋ ينستيتۋتى اتالمىش شاراعا بۇۇ-نىڭ جاھاندىق ازاماتتىق جانە تۇراقتى دامۋ باعىتىنداعى باستامالارىن جۇزەگە اسىرۋ بويىنشا ىنتىماقتاستىقتىڭ پەرسپەكتيۆالارىن تالقىلاۋ ماقساتىندا شاقىرىلدى.

قازۇۋ «بۇۇ-نىڭ «اكادەميالىق ىقپال» جاھاندىق حابىن 2014 جىلدان بەرى باسقارىپ كەلەدى جانە باعدارلامانىڭ ماڭىزدى قاعيدالارىن ىسكە اسىرۋدا حالىقارالىق دەڭگەيدە تانىمال كوسباسشى بولىپ تابىلادى.

ءال-فارابي اتىنداعى قازۇۋ-دىڭ رەكتورى، اكادەميك عالىم مۇتانوۆتىڭ «ۋنيۆەرسيتەت 4.0 - جوعارى ءبىلىم بەرۋدەگى جاڭا كەزەڭ» اتتى بايانداماسى فورۋم قاتىسۋشىلارىنىڭ ەرەكشە قىزىعۋشىلىعىن تۋدىردى. اتالمىش باستاما بۇعان دەيىن بۇۇ-نىڭ نيۋ-يوركتەگى شتاب-پاتەرىندە مامىر ايىندا وتكىزىلگەن كونفەرەنتسيا بارىسىندا العاش رەت ۇسىنىلعان بولاتىن. وسى قىزمەتتەگى ايقىن باعىت-باعدار مەملەكەتتىك باعدارلاما «بولاشاققا باعدار: قوعامدىق سانانى جاڭعىرتۋ» بولىپ تابىلادى.

جاڭا ۋنيۆەرسيتەت مودەلىنىڭ ميسسياسى جاستاردى بويىندا الەمدىك جوعارى رۋحاني-ادامگەرشىلىك قاسيەتتەرى مەن بەلسەندى ازاماتتىق ۇستانىمى بار ىزگىلىكتى ازامات رەتىندە قالىپتاستىرۋ. فورۋمعا قاتىسۋشىلاردىڭ اتاپ وتكەنىندەي، «ۋنيۆەرسيتەت 4.0» جاڭا مودەلى جاھاندانۋ جاعدايىندا، سونداي-اق جاڭا تەحنولوگيالاردىڭ قارقىندى دامۋى كەزەڭىندە ەرەكشە ماڭىزدى.

قازاقستاندىق جوعارى وقۋ ورنىنىڭ فورۋمعا قاتىسۋىنىڭ باستى ناتيجەسى عالامدىق ازاماتتىق ورتالىعى (اۆستريا), تۇراقتى دامۋ ينستيتۋتى (وڭتۇستىك كورەيا) جانە ءال-فارابي اتىنداعى قازۇۋ اراسىندا ستراتەگيالىق سەرىكتەستىك تۋرالى كەلىسىمگە قول قويۋ بولىپ تابىلدى. قۇجاتتى اۆستريانىڭ ەكس-پرەزيدەنتى حاينتس فيشەر، بۇۇ-نىڭ سەگىزىنشى باس حاتشىسى پان گي مۋن جانە قازۇۋ رەكتورى عالىم مۇقانوۆ (قازاقستان) قولدارىن قويىپ بەكىتتى. كەلىسىم-شارت ادامزاتتىڭ جاھاندىق ماسەلەلەرى مەن قازىرگى زاماننىڭ سىن-تەگەۋرىندەرىن شەشۋدە تاراپتاردىڭ كۇش-جىگەرىن بىرىكتىرۋگە مۇمكىندىك بەرەدى.

“The Qazaq Times”