«ەرلىك اتاۋلىنىڭ ىشىندەگى ەڭ كەرەمەتى – ەڭبەك ەرلىگى» دەپتى گوركي. بىراق الەمدى بىلاي قويعاندا، ەلىمىزدە مۇنداي ەرلىك جاساي الماي جۇرگەندەر كوپ.  وسىدان ءبىر جىل بۇرىن قر ۇلتتىق ەكونوميكا مينيسترلىگى ستاتيستيكا كوميتەتىنىڭ باعالاۋى  بويىنشا، 2016 جىلى جۇمىسسىزدار سانى 439,3 مىڭ ادام بولعان، ال جۇمىسسىزدىق دەڭگەيى 4,9 پايىزدى قۇراعان.

حالىق جۇمىسپەن قامتىلىپ جاتىر دەگەننىڭ وزىندە بۇل كورسەتكىش اسا قۋانتا قويمادى. «قازاق – جالقاۋ حالىق» دەگەندى ءوزىمىز ەمەس، كوشەدە وزگە ۇلتتان ەستىگەندە قورلانادى ەكەنسىڭ، راسىندا. قازاقستاندا سونداي ستەرەوتيپ قالىپتاسىپ قالعان. شىن مانىسىندە سولاي ما؟ ەگەر «2016-2017 جىلدارى الەمدە جۇمىسسىزدار سانىنىڭ ءوسۋى جالعاسىپ، 200 ميلليونعا جۋىق ادامدى قۇرايدى» دەگەن مالىمەتكە سۇيەنسەك، جالعىز قازاق ەمەس ەكەن جالقاۋلانىپ نە جۇمىس تاپپاي جۇرگەن. دەگەنمەن فاكت بار.

بۇگىن «The Sun» اتالاتىن سايتتا ءبىر قىزىق جازباعا كوزىمىز شالىندى. سان-فرانتسيسكوداعى ايماقتىق تەمىرجول جەلىسىن تازالاۋشى ليان چجاو چجان ەسىمدى ادام جىلىنا 230 مىڭ دوللار تابىس تابادى ەكەن. ويلاڭىزشى. 230 مىڭ دوللار! بيزنەسمەن ەمەس، تازالاۋشى عانا.

ەر ادام دەمالىسسىز، اپتاسىنا 7 كۇن، 17 ساعاتتان جۇمىس جاسايدى. لياننىڭ نەگىزگى جالاقىسى جىلىنا 56 مىڭ دوللاردى قۇرايدى، ال قالعان 14 مىڭ دوللاردى كومپانيا وعان  بونۋس رەتىندە تولەيدى ەكەن. ونىڭ ۇستىنە ءوز جۇمىسىن ارتىعىمەن ىستەگەندىكتەن (جانە ۋاقىتىن ۇزارتقاندىقتان) وعان تاعى 162 مىڭ دوللار قوسىلادى. 17 ساعاتتىڭ نەبارى 60-90 مينۋتىن عانا ۇزىلىسكە پايدالاناتىن ازامات كەز كەلگەن  جۇمىستان باس تارتپايتىندىعىن ايتادى. سونداي ەڭبەكقورلىعىنىڭ ارقاسىندا سوڭعى ءۇش جىلدا  680 مىڭ دوللار ەڭبەكاقى العان.

ءيا. «ەكى قولعا ءبىر ءىس، ەرتە تۇر دا كىرىس!»  ادام بالاسى وزگە ادام ىستەپ جۇرگەن قىزمەتتى يگەرە المايدى ەمەس، يگەرە الادى.  قولدان كەلىپ تۇرعان نارسە عوي، تەك بويداعى جالقاۋلىق جىبەرمەيدى. كوپكە توپىراق شاشپايمىز. سەبەبى، ەلباسىنىڭ ءوزى ايتقان:  «مەن ءاربىر قازاقستاندىقتىڭ ەرتەڭگى كۇنى سەنىمدى بولۋىن قالايمىن. ءار تالپىنعان ازاماتتىڭ جۇمىسى بولۋى كەرەك، وتباسىن اسىراۋعا قاجەتتى تابىسى بولۋى كەرەك. ءبىز وسىعان كومەكتەسۋگە ءتيىسپىز. كومەكتەسكەندە وعان بەرەتىن مەملەكەتتىڭ تەگىن تاراتىلىپ جاتقان اقشاسى جوق. وزبەكتە ماقال بار: «بەكەر وتىرعانشا، بەكەر جۇمىس ىستە» دەگەن. سوندىقتان دا، ءبىز دە سونى ۇيرەنۋگە ءتيىسپىز. قازاق جالقاۋ دەگەن انەكدوتتان قۇتىلۋ كەرەك!»

راس. ءومىر ەڭبەكسىز ەشتەڭە بەرمەيدى. ەڭبەك ەت! ءومىر ءسۇر!

«The Qazaq Times»