مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ حابارلاۋىنشا، سىرتقى ىستەر مينيسترلىگىنىڭ بۇرىنعى جاۋاپتى xاتشىسى اناربەك قاراشەۆتىڭ ءۇيىن ءتىنتۋ كەزىندە 1,5 ملن اقش دوللارى تاركىلەنگەن. 

دەرەكتەرگە سۇيەنسەك، اناربەك قاراشەۆ وزىنە قاراستى ساكەنوۆا، نۇرەكەنوۆ جانە جۇماسانوۆا اتتى قىزمەتكەرلەردەن پارا العان جانە زاڭعا قارسى ارەكەتتەردى جاسىرىپ كەلەن. اتالعان ۇشتىك حالىقارالىق دەڭگەيدەگى شارالاردى وتكىزگەن كاسىپكەرلەردەن 28 ملن تەڭگەدەن استام پارا العانى ءۇشىن جاۋاپقا تارتىلىپ وتىر. مەملەكەتتىك قىزمەتكەرلەردىڭ شەتەلدىك ساپارلارىنا اۋە بيلەتتەرىن ساتىپ الۋمەن اينالىسقان كومپانيا بيۋدجەتكە 10 ملن تەڭگە كولەمىندە شىعىن كەلتىرگەنى بەلگىلى بولدى. پارا الۋدان بولەك، قاراشەۆ جيەنىنىڭ فيرماسىنا دا اسىرا قولداۋ كورسەتكەن.

جارتى جىلدا سىرتقى ىستەر مينيسترلىگى اياسىندا 75 مىڭ مەملەكەتتىك قىزمەت ءتۇرى ۇسىنىلعان. بىراق اتالعان قىزمەتتەردىڭ 100%-ى قاعاز كۇيىندە قالدى دەسەك تە بولادى. قازاقستاننىڭ بارلىق مەملەكەتتىك ورگاندارىندا ساندىق تەحنولوگيامەن جۇمىستى قارقىندى دامىتۋ قولعا الىنعانمەن، ناقتى ناتيجەنىڭ بولماي تۇرعان جايى بار. جۇيەدەگى سالعىرتتىق پەن قاعازباستىلىقتىڭ سالدارىنان دا حالىقپەن تىكەلەي بايلانىس ورناتۋ ارقىلى، سىبايلاس جەمقورلىق كورسەتكىشى ارتادى.

ەسكە سالا كەتەيىك، بيىل 30-دان استام شەنەۋنىك پارا العانى ءۇشىن ۇستالعان بولاتىن. ولاردىڭ باسىم بولىگىنە قىزمەتىن اسىرا پايدالاندى جانە ءىرى كولەمدى قارجى جىمقىردى دەگەن ايىپ تاعىلعان. قازاقستان ءۇشىن باستى قاۋىپ جەمقورلىقتىڭ قاشان تۇبەگەيلى اۋىزدىقتالارى بەيمالىم.

"The Qazaq Times"