بۇگىن «Kazakh Tourism» ۇلتتىق كومپانياسىنىڭ ۇيىمداستىرۋىمەن «ۇلى دالا eلىنە ساياحات» جوباسى باستالدى. ەكسپەديتسيا سارىارقا باعىتى بويىنشا ءجۇرىپ، 4 قىركۇيەككە دەيىن سوزىلادى. بارلىعى 16 كۇن ىشىندە ەكسپەديتسيا مۇشەلەرى اقمولا، پاۆلودار، قاراعاندى جانە سولتۇستىك قازاقستان وبلىستارىنىڭ ەڭ قىزىقتى جەرلەرىمەن تانىسادى.

اتالعان ەكسپەديتسيا قۇرامىندا ساياحاتشىلار، تەلەۆيزيا جۋرناليستەرى، شەتەلدىك جانە قازاقستاندىق ترەۆەل-بلوگەرلەر بار.  جوبا ەلىمىزدەگى ەڭ ماڭىزدى تۋريستىك كلاستەرلەردى، سونداي-اق قازاقستاننىڭ ون ءبىر وبلىسى بويىنشا التى باعىتتى قامتيدى: « «تيان-شان مارجاندارى»، «التاي – وركەنيەت بەسىگى»، «جەتىسۋ الاتاۋى»، «سارىارقا»، «تەڭىزدەن تەڭىزگە دەيىن» جانە «جاڭا جىبەك جولى». سوڭعى باعىتتا قازاقستاندىق قاتىسۋشىلارعا "National Geographic" رەسەي تەلەارناسىنىڭ توبى دا قوسىلاماق.

جوباعا قاتىسۋشىلار «بۇيراتاۋ» مەملەكەتتىك ۇلتتىق تابيعي ساياباعىنان باستاپ، پاۆلودار وبلىسىنداعى باياناۋىل ۇلتتىق ساياباعىنا، قارقارالى، كوكشەتاۋ مەملەكەتتىك ۇلتتىق تابيعي ساياباقتارىنا جانە قورعالجىن مەملەكەتتىك تابيعي قورىعىنا ساياحات جاسايدى. ەلىمىزدىڭ كورنەكى جەرلەرى مەن تاريحي نىساندارىمەن تانىسۋ بارىسىندا ساياحاتشىلار بارلىعى 4595 شاقىرىم جول ءجۇرىپ وتەدى. جوعارىدا اتالعان باعىتتار ىشكى جانە سىرتقى ءتۋريزمدى مەيلىنشە كوپ قامتۋ ەسەبىمەن جۇزەگە اسىپ وتىر. «ۇلى دالا ەلىنە ساياحات» جوباسىنىڭ قورىتىندىسى رەتىندە تۋريزم دامۋىنىڭ دەڭگەيى مەن ماسەلەلەرى تالقىلانادى.

"The Qazaq Times"