ساۋد ارابياسى العاش رەت شەتەلدىكتەرگە تۋريستىك ۆيزالاردى بەرەتىنىن جاريالادى. بۇعان دەيىن ەل شەتەلدىك قاجىلار مەن كاسىپكەرلەرگە عانا ۆيزا بەرگەن. بۇل دا تاق مۇراگەر حانزاداسى مۇحاممەد بين سالمان ەل ەكونوميكاسىن مۇناي ەكسپورتىنا تاۋەلدى بولدىرماۋ ماقساتىندا جاساعان رەفورمالارىنىڭ ءبىرى.

شەتەلدىك تۋريستەرگە ەسىگىن اشقان ساۋد پاتشالىعى جول سەرىك جاقىندارى جوق ايەلدەردىڭ دە ەلگە كىرۋىنە رۇقسات بەردى. بۇدان بۇرىن ساۋد ارابيالىق ايەلدەردىڭ جاقىندارى جولسەرىك بولماسا شەتەلگە شىعۋعا جانە شەتەلدىك ايەلدەردىڭ جولسەرىكسىز ەلگە كىرۋىنە شەكتەۋ قويىپ كەلگەن.

دەگەنمەن، مۇسىلماندار ءۇشىن قاسيەتتى سانالاتىن مەكە مەن مەدينا قالالارىنداعى زيارات ورىندارىنا مۇسىلمان ەمەستەردىڭ كىرۋىنە ءالى دە شەكتەۋ بار.

حانزادا مۇحاممەد ەلدىڭ بيلىگىنىڭ باسىم كوبىن ءوز قولىندا ۇستاپ تۇرعانى بەلگىلى. ول 2025 جىلعا دەيىن ەل ەكونوميكاسىنىڭ مۇناي ەكسپورتىنا دەگەن تاۋەلدىلىگىن 50 پايىزعا دەيىن ازايتىپ، ارى قاراي بۇتىندەي مۇناي ەكسپورتىنا تاۋەلسىز ەكونوميكا قۇرۋ جوباسىن جاريالاعان. ول بۇل رەتتە ەلدىڭ قاتىپ قالعان ءدىني كونسەرۆاتيزمگە  جۇيەسىنە بەلگىلى دەڭگەيدە وزگەرىستەر الىپ كەلدى. ايتالىق، ايەلدەردىڭ ەرلەر قاتارلى كولىك جۇرگىزۋىنە جانە كينوتەاترلارعا بارۋىنا رۇقسات ەتتى.

دەي تۇرعانمەن، شەتەلدىك ساراپشىلار ساۋد ارابياسى الەم تۋريستەرىنىڭ اعىلىپ باراتىن بەكەتىنە اينالۋى ەكىتالاي دەپ قارايدى. سەبەبى، الكاگولدى ىشىمدىكتەرگە قويىلعان قاتاڭ شەكتەۋلەر، ءدىني كونسەرۆاتيزم شەتەلدىك تۋريستەردىڭ ىنتاسىنا كەرى اسەر ەتۋى مۇمكىن دەپ سانايدى. ونىڭ ۇستىنە جۋريناليست حاشوگگيدىڭ ءولىمى ەلدىڭ حالىقارالىق ءيميدجىن تومەندەتىپ جىبەرگەن.

“The Qazaq Times”