قازاقستان ءۇشىن 28-بۇكىلالەمدىك ۋنيۆەرسيادا ويىندارى قالاي اياقتالدى؟

«قاناتىڭدى كەڭ سەرپى!» بۇل تىركەس – 28-بۇكىلالەمدىك قىسقى ۋنيۆەرسيادا-2017 سايىسىنىڭ ۇرانى بولدى. بيىلعى ەلىمىزدە وتكەن ون كۇندىك ستۋدەنتتىك ويىندار قازاقستان ءۇشىن جەڭىستى دە جەمىستى بولدى. ءاربىر قاتىسۋشى ءۇشىن قازاقستاندىقتار تاقىمىن قىسىپ، قولداپ وتىردى. 3000 ەرىكتى جۇمىلدىرىلعان بۇل ويىندارعا ودان بولەك  270.000 جالپى كورەرمەن، 50.000 ەستافەتانى قولداۋشىلار، 20.000 اشىلۋ مەن جابىلۋ سالتاناتىنىڭ قوناقتارى كەلدى. «تاباعان» (فريستايل), «الاتاۋ» (شاڭعى، بياتلون), «سۇڭقار» (ترامپلين), «شىمبۇلاق»، بالۋان شولاق اتىنداعى سپورت سارايى، «مەدەۋ» مۇز ايدىنى (كونكيمەن سىرعاناۋ), اتلەتيكا الاڭى، حالىق-ارەنا جانە الماتى-ارەنادا وتكەن 12 سپورت تۇرىنەن 56 ەلدىڭ  1600-دەن استام سپورتشى دوداعا تۇسكەن جانە ساراپقا سالىنعان مەدالداردىڭ سانى –85. قازاقستان اتىنان 171 سپورتشى قاتىسسا، جالپى ەسەپتە ءبىرىنشى ورىنعا تۇراقتاعان رەسەيدىڭ 215 ويىنشىسى سىنعا تۇسكەن. سونداي-اق، الماتى قالاسىندا وسى قىسقى ۋنيۆەرسيادا قارساڭىندا 180 سپورتتىق ءىس-شارا ءوتتى.

ۋنيۆەرسيادا–2017 قازاقستان ءۇشىن ەڭ جوعارى ناتيجەمەن اياقتالدى دەۋگە تولىق نەگىز بار.  ەل قورجىنىندا: 36 مەدال – 11 التىن، 8 كۇمىس، 17 قولا. قازاقستان كوماندالىق ەسەپتە رەسەيدەن كەيىنگى ەكىنشى ورىنعا تابان تىرەدى.

نازارلارىڭىزعا  جۇلدەگەرلەردىڭ ءتىزىمىن ۇسىنامىز:

«التىن» مەدال يەگەرلەرى

بياتلون:

الينا رايكوۆا (جەكە جارىس،15 كيلومەتر);

گالينا ۆيشنەۆسكايا (سپرينت، 7,5 كيلومەتر);

گالينا ۆيشنەۆسكا (ماسس-ستارت، 12,5 كيلومەتر).

شاڭعىمەن جارىس:

يۆان ليۋفت (سپرينت);

اننا شەۆچەنكو مەن ولجاس كليمين (سپرينت، كوماندالىق سايىس).

مانەرلەپ سىرعاناۋ:

دەنيس تەن (ەرلەر اراسىنداعى ەركىن باعدارلاما).

فريستايل:

يۋليا گالىشەۆا  (موگۋل);

دميتري رەيحارد (موگۋل);

يۋليا گالىشەۆا (پارالەلدى موگۋل);

دميتري رەيحارد  (پارالەلدى موگۋل);

جانبوتا الدابەرگەنوۆا مەن باعلان ىڭكاربەك (اكروباتيكا، كوماندالىق سايىس).

«كۇمىس» جۇلدەگەرلەر

بياتلون:

گالينا ۆيشنەۆسكا (جەكە جارىس، 15 كيلومەتر);

رومان ەرەمين (ماسس-ستارت، 15 كيلومەتر;

گالينا ۆيشنەۆسكا، داربيا ۋسانوۆا، ۆاسيلي پودكورىتوۆ پەن انتون پانتوۆ (ارالاس ەستافەتا).

شاڭعى ويىندارى:

اننا شەۆچەنكو، ولگا ماندريكا مەن يرينا بىكوۆا (ەستافەتا)

سەرگەي مالىشەۆ، ۆيتالي پۋحكالو، رينات مۋحين مەن ولجاس كليمين     (كوماندالىق ەستافەتا).

فريستايل:

جيبەك اراپباەۆا (اكروباتيكا).

شورت-ترەك:

ابزال اجىعاليەۆ (500 مەتر).

حوككەي:

قازاقستاننىڭ ەرلەر قۇراماسى.

«قولا» جۇلدە يەگەرلەرى:

بياتلون:

رومان ەرەمين (سپرينت، 10 كيلومەتر);

انتون پانتوۆ (ماسس-ستارت، 15 كيلومەتر).

كونكيمەن جارىس:

ەكاترينا ايداروۆا (1500 مەتر);

ەكاترينا ايداروۆا (1000 مەتر)

شاڭعىمەن جارىس:

اننا شەۆچەنكو (جەكە جارىس، 5 كيلومەتر);

اننا شەۆچەنكو (5 كيلومەتر);

اننا ستويان (سپرينت);

اننا شەۆچەنكو (ماسس-ستارت، 15 كيلومەتر);

سەرگەي مالىشەۆ (ماسس-ستارت، 3 كيلومەتر).

فريستايل:

جانبوتا الدابەرگەنوۆا (اكروباتيكا);

پاۆەل كولماكوۆ (موگۋل);

پاۆەل كولماكوۆ (پاراللەلدى موگۋل).

شورت-ترەك:

نۇربەرگەن جۇماعازيۆە (1500 مەتر);

دەنيس نيكيشا  (500 مەتر);

دەنيس نيكيشا (1000 مەتر);

قازاقستاننىڭ ايەلدەر قۇراماسى (ەستافەتا);

قازاقستاننىڭ ەرلەر قۇراماسى (ەستافەتا).

وسىنداي ناتيجەمەن سپورتشىلارىمىز ەلدىڭ ابىرويىن اسقاقتاتىپ، رۋحىن ءبىر كوتەردى.

كەشە، 8 اقپان كۇنى 10 كۇنگە سوزىلعان 28-بۇكىلالەمدىك ۋنيۆەرسيادا-2017 ستۋدەنتتىك سايىستىڭ جابىلۋ سالتاناتى ءوتتى. وعان قر پرەمەر-ءمينيسترى باقىتجان ساعىنتاەۆ، حالىقارالىق ستۋدەنتتىك سپورت فەدەراتسياسىنىڭ پرەزيدەنتى ولەگ ماتىتسين، الماتى قالاسىنىڭ اكىمى باۋىرجان بايبەك جانە FISU جالاۋىن سالتاناتتى تۇردە قابىلداپ الۋ ءۇشىن كراسنويارسك قالاسىنىڭ مەرى ەدحام اكبۋلاتوۆ قاتىستى. ياعني، ۋنيۆەرسيادا-2019 ەندىگى كەزەكتە كراسنويارسك قالاسىندا وتەدى.

قر پرەمەر-ءمينيسترى باقىتجان ساعىنتاەۆ جابىلۋ سالتاناتىندا بىلاي دەدى:

«قادىرلى سپورت سۇيەر قاۋىم! قۇرمەتتى ماتىتسين مىرزا!

مىڭجىلدىق تاريحى بار الماتى ەكى اپتا بويى الەمنىڭ سپورت سۇيەر قاۋىمىنىڭ كوز تارتار ورتالىعىنا اينالدى. وسى ۋاقىت ىشىندە الەم قازاقستاندى، قازاقستان الەمدى جاڭاشا قىرىنان تانىدى. حالىقارالىق قاۋىمداستىق حالقىمىزدىڭ تامىرى تەرەڭ مادەنيەتى مەن قانىنا بىتكەن قوناقجايلىعىن، ۇزدىكسىز دامۋ مەن الەمدىك باسەكەلەگى قايراتىن سەزدى. الماتى ۋنيۆەرسياداسى – الەم سپورتىنىڭ تاريحىنا وزىندىك ءىزىن قالدىردى. ءدۇبىرلى دودانىڭ سالاناتتى اشىلۋ راسىمىندە ەلباسى نۇرسۇلتان نازارباەۆ: «سپورت – بەيبىتشىلىك پەن تاتۋلىقتىڭ، ىنتىماقتاستىق پەن تىلەكتەستىكتىڭ سيمۆولى. جەر جاھان كوز تىككەن بۇل ۋنيۆەرسيادا – ناعىز جاستىق جىگەردىڭ الامانى، جارقىن جەڭىستەردىڭ باستاۋى، بولاشاق وليمپيادا چەمپيوندارىنىڭ مەكتەبى»، – دەگەن بولاتىن. راسىمەن دە، حالىق پەن حالىقتى، تىلەگى ءبىر، ماقساتى ءبىر جاستاردى بىرىكتىرگەن ۋنيۆەرسيادا ەڭ اۋەلى – شۋاقتى باس قوسۋ».

ءيا، 2017 جىلعى دۇنيەجۇزىلىك ۋنيۆەرسيادانىڭ تۇمارى رەتىندە سۇڭقار الىنعان ەدى. سەبەبى، ول جەڭىلدىك پەن جىلدامدىقتى، كۇش-قۋات پەن جەڭىسكە دەگەن قۇلشىنىستى بەينەلەيدى. بۇل تۇمار – قازاقستاننىڭ تۇمارى بولعانداي. راسىمەن، «وليمپيادا ويىندارىنىڭ مەكتەبىنەن» وتكەن، وسى دودادا جۇلدەگەر اتانعانى دا، قاتىسقانى دا، جالپى  اربىر سپورتشى بولاشاقتا ەلدىڭ نامىسىن نارداي كوتەرەتىنىنە، دۇنيەجۇزىلىك وليمپيادا ويىندارىندا جۇلدىزدارى جارقىرايتىنىنا سەنىمىمىز مول. العا، قازاقستان! راحمەت، ۋنيۆەرسيادا! ەندى ءبىز وليمپيادانى وتكىزۋگە دايىنبىز!

«The Qazaq Times»