فوتو: mod.gov.kz

قازاقستان رەسپۋبليكاسىنىڭ قورعانىس ءمينيسترى گەنەرال-پولكوۆنيك ساكەن جاسۇزاقوۆ 2017 جىلى ماڭىزدى رەسپۋبليكالىق جانە حالىقىرالىق سايىستاردا ايرىقشا كوزگە تۇسكەن ارميا ورتالىق سپورت كلۋبىنىڭ ارميالىق سپورتشىلارىمەن كەزدەسۋ وتكىزدى دەپ حابارلايدى قورعانىس مينيسترلىگىنىڭ ءباسپاسوز ءبولىمى.

قورعانىس ۆەدومستۆوسىنىڭ باسشىسى اوسك شتاتتىق كوماندالارىنىڭ بىرقاتار سپورتشىلارىنا، رەسپۋبليكالىق جانە حالىقارالىق جارىستاردىڭ جەڭىمپازدارى مەن جۇلدەگەرلەرىنە كەزەكتى اسكەري اتاق بەرىپ، قۇرمەت گراموتالارىن تابىس ەتتى.

«جىلدان جىلعا بايراقتى باسەكەدە مەدال قورجىنىن تولتىرىپ، قازاقستاننىڭ تۋىن كوككە جەلبىرەتىپ، ەلىمىز بەن قارۋلى كۇشتەردىڭ نامىسىن قورعاپ جۇرسىزدەر. بۇگىندە قورعانىس مينيسترلىگى اسكەري قىزمەتشىلەردىڭ دەنە دايارلىعىنا ايرىقشا كوڭىل بولۋدە. بۇل ءوز جەمىسىن بەرۋدە جانە سپورتتىق ناتيجەلەرگە جەتۋىمىزدىڭ بىردەن-ءبىر سەبەبى. قارۋلى كۇشتەردەگى سپورت العا قاراي ىلگەرىلەپ قادام باسىپ كەلەدى. مەن بولاشاقتا ءبىز وسى قالپىمىزدان تايمايمىز دەپ ۇمىتتەنەمىن»، - دەپ، مينيستر ءوزىنىڭ ىستىق لەبىزىن ءبىلدىردى.

قورعانىس مينيسترىمەن سالتاناتتى كەزدەسۋگە قاتىسقان سپورتشىلاردىڭ قاتارىندا قازاقستاننىڭ مىقتى قۇزعا ورمەلەۋشىلەرى كىشى سەرجانت ارتەم مەن نيكيتا دەۆياتەريكوۆتار، VII قىسقى ازيادا ويىندارىنىڭ بياتلوننان چەمپيونى كىشى سەرجانت يان ساۆيتسكي، ححVIII قىسقى بۇكىلالەمدىك ۋنيۆەرسيادا چەمپيونى، بياتلونشى سەرجانت الينا رايكوۆا، سپورتتىق باعدارلاۋدا ءىىى قىسقى بۇكالەمدىك اسكەري ويىنداردىڭ جەڭىمپازى سەرجانت ەلميرا مولداشەۆا بولدى.

بۇگىنگى تاڭدا قازاقستان قورعانىس مينيسترلىگىنىڭ ارميا ورتالىق سپورت كلۋبىندا سپورتتىڭ اسكەري-قولدانبالى ءتۇرى بويىنشا ءۇش كوماندا جانە وليمپيادا تۇرلەرى بويىنشا 15 كوماندا بار.

اسكەري سپورتشىلار رەسپۋبليكالىق تۋرنيرلەردە ءساتتى ونەر كورسەتىپ، جوعارى ناتيجەلەر مەن كەرەمەت دەنە دايارلىقتارىن پاش ەتە وتىرىپ، الەمدىك ارەنادا قازاقستان مەن ەلىمىزدىڭ قارۋلى كۇشتەرىن لايىقتى دەڭگەيدە تانىتىپ ءجۇر. اعىمداعى جىلدىڭ باسىنان اوسك-نىڭ 100-دەن اسا سپورتشىسى رەسپۋبليكالىق جانە حالىقارالىق دەڭگەيدەگى 17 سايىسقا قاتىستى. وندا ولار ءارتۇرلى دارەجەدەگى 70-تەن اسا مەدالدى جەڭىپ العان بولاتىن.

“The Qazaq Times”