قوستاناي وقۋشىلارىنا بيىلدان باستاپ روبوت ساباق بەرەتىن بولدى. 

قوستاناي قالالىق «وزات» اقپاراتتىق تەحنولوگيالار ليتسەيىنىڭ ديرەكتورى ەرلان بەكىشەۆ بيىلعى وقۋ جىلىندا مەكتەپ وقۋشىلارىن قانداي جاڭالىقتار كۇتىپ تۇرعانىن ايتىپ بەردى.

ونىڭ سوزىنشە، ەندى ليتسەيدىڭ ءبىرىنشى قاباتى تۇگەلدەي IT-تەحنولوگيالارعا ارنالاتىن بولادى. ءبىرىنشى قاباتتاعى جوندەۋ جۇمىستارى 90% -عا ورىندالعان. قازىرگى ۋاقىتتا مەكتەپ ۇجىمى جاڭا جابدىقتاردىڭ كەلۋىن كۇتۋدە. مۇندا موبيلدىك سىنىپتار جاسالىپ وقۋشىلار كۇن باتارەيالارىمەن، 3D-مودەلدەۋ جۇمىستارىمەن اينالىساتىن بولادى.

«بۇل جىلى وقۋشىلارعا روبوت ساباق بەرەتىن بولادى. ول تولىق اۆتونومدى تۇردە جۇمىس ىستەيدى. بۇل روبوت وقۋشىلارمەن لوگيكالىق ديالوگ ورناتادى جانە ولاردىڭ كەز-كەلگەن سۇراعىنا جاۋاپ بەرە الادى. جاقىن ۋاقىتتا روبوتتى قوستانايعا جەتكىزۋى كەرەك »، – دەيدى ليتسەي ديرەكتورى ەرلان بەكىشەۆ.

بۇدان باسقا، ليتسەيدە انيماتسيا جانە كينەماتوگرافيا ستۋدياسى اشىلادى. سونداي-اق، «وزات»-تا كيبەرسپورت بويىنشا چەمپيونداردى دايىندايتىن بولادى جانە تاقىرىپتىق كابينەت اشىلادى. سونىمەن قاتار، زالدا وقۋشىلار مەن ولاردىڭ اتا-انالارى ساباق كەستەسىن قارايتىن جانە ءوز جوبالارىنىڭ تۇساۋكەسەرلەرىن وتكىزەتىن LED ەكران ورناتىلادى.

“The Qazaq Times”