ايىپتاۋشى تاراپ سايراگۇل ساۋىتبايدى سوت زالىنان بوساتۋدى سۇرادى

پانفيلوۆ اۋداندىق سوتىنداعى جارىس سوزدە ايىپتاۋشى تاراپ سايراگۇل ساۋىتبايدى سوت زالىنان بوساتۋدى سۇرادى.

بۇگىن تامىز ايىنىڭ 1-ءى كۇنى پانفيلوۆ اۋداندىق سوتىندا پروكۋرور ارزىگۇل يمياروۆا «قازاقستان شەكاراسىن زاڭسىز كەسىپ ءوتتى» دەگەن ايىپ تاعىلعان سايراگۇل ساۋىتبايدىڭ  بالالارى قازاقستان ازاماتى ەكەنىن، وسى ەلدە تۇراتىنىن جانە بالالارىمەن كەزدەسۋىن قامتاماسىز ەتۋ قاجەتتىگىن ايتتى. ول وسىعان بايلانىستى ءارى ساۋىتباي قىلمىسىن مويىنداعاندىقتان وعان قازاقستاننان شىعارۋ جازاسىن قولدانباۋدى سۇرادى.

جارىس ءسوز. فوتو: QT

ء"ىس-ارەكەتىندە قىلمىستىق جازانى اۋىرلاتاتىن جاعدايلار بولماعاندىقتان، ونى قازاقستان قىلمىستىق كودەكسىنىڭ 392-بابى 1 بولىگىمەن ("مەملەكەتتىك شەكارانى زاڭسىز قاساقانا كەسىپ ءوتۋ" - رەد.) كىنالى دەپ تانىپ، التى ايعا باس بوستاندىعىنان ايىرۋ، بىراق ونى شارتتى جازاعا اۋىستىرۋ جانە التى اي پروباتسيالىق باقىلاۋعا الۋ جازاسىن كەسۋدى جانە سوت زالىنان بوساتۋدى سۇرايمىن" دەدى پروكۋرور

ايىپتاۋشى تاراپتان كەيىن ءسوز العان سايراگۇل ساۋىتباي مەن ونىڭ قورعاۋشىسى ابزال قۇسپان پروكۋروردىڭ سۇراعان جازاسىمەن كەلىسەتىندىكتەرىن مالىمدەدى. وسىدان كەيىن سۋديا سوت ۇكىمى ساعات 15-30-دا وقىلاتىنىن ايتىپ، ءۇزىلىس جاريالادى.

“The Qazaq Times”