سايراگۇل ساۋىتباي ىسىنە قاتىستى سوت وتىرىسى تاعىدا كەيىنگە قالدىرىلۋى مۇمكىن

سايراگۇل ساۋىتباي ىسىنە قاتىستى سوت وتىرىسى جاڭادان قوسىلعان قۇجاتتارعا بايلانىستى كەيىنگە قالدىرىلۋى مۇمكىن.

سوت زالى. فوتو: QT

بۇگىن پانفيلوۆ اۋداندىق سوتىندا سايراگۇل ساۋىتبايعا قاتىستى سوت وتىرىسى ءوتۋى ءتيىس. بىراق سايرانگۇل ساۋىتبايعا قر ءىىم-ءنىڭ «پانا ىزدەۋشى تۇلعالارعا» ارنالعان ارنايى قۇجات بەرۋىنە بايلانىستى سوت وتىرىسى تاعىدا  ۇزارتىلۋى مۇمكىن.

سايرانگۇل ساۋىتبايدىڭ تۋىستارى مەن سوت پروتسەسىنە كەلگەن قوعام بەلسەندىلەرى. فوتو: QT

ەستەرىڭىزگە سالايىق، شىلدە ايىنىڭ 23-ءى كۇنى وتكەن سوت وتىرىسىندا سوت تورەشىسىنىڭ شەشىمى بويىنشا، سوت پروتسەسى كەيىنگە شەگەرىلىپ، 25 شىلدە كۇنىنە بەلگىلەنگەن. وعان قورعاۋشىلار تارابىنىڭ، قوعام بەلسەندىلەرىنىڭ، زيالى قاۋىم وكىلدەرىنىڭ قر پرەزيدەنتى مەن باس پروكۋراتۋراعا جازعان اشىق حاتتى سوتقا ۇسىنۋى سەبەپ بولعان. بۇعان قوسا قورعاۋشى تاراپ ايىپتالۋشى سايراگۇل ساۋىتبايدىڭ كۇيەۋىنىڭ جەكە كۋالىگىن، زاڭدى نەكە كۋالىگى جانە بالالارىنىڭ تۋ تۋرالى كۋالىكتەرىن، سونداي-اق، حالىقارالىق بالالار قۇقىعىن قورعاۋ تۋرالى كونۆەنتسيانى تىركەۋدى سۇراعان. ال، ايىپتاۋشى جاق اتالعان  قۇجاتتارمەن تانىسۋعا 25 شىلدەگە دەيىن ۋاقىت بەرۋدى سۇرادى. الايدا سوت پروكۋرور سۇراعان مەرزىمدە سايراگۇلدى قورعاۋشى ادۆوكاتتىڭ الدىن الا بەلگىلەنگەن ءىس-ساپارىنا بايلانىستى كەلەسى سوت وتىرىسى 1 تامىز كۇنى ساعات 10:00-گە دەيىن شەگەرگەن.

اتالمىش سوت وتىرىسىنا قاتىستى تولىققاندى اقپاراتتاردى الداعى ۋاقىتتا حابارلايتىن بولامىز.

“The Qazaq Times”