قاسىموۆتىڭ ورنىنا پوليتسيا گەنەرال-مايورى تۇرعىمباەۆ كەلدى

قازاقستاننىڭ ءىىم باسشىسى قالمۇحانبەت قاسىموۆتىڭ ورنىنا ەرلان تۇرعىمباەۆ تاعايىندالدى. بۇل تۋرالى اقوردا حابارلاپ وتىر.

سوڭعى ءبىر جىلدىڭ ىشىندە قالمۇحانبەت قاسىموۆتى وتستاۆكاعا كەتسىن دەگەن تالاپ تۇرعىندار اراسىندا كەڭىنەن بەلەڭ العاندىعى راس. دەنيس تەننىڭ قازاسى، قاراعاندىداعى قاندى وقيعا مۇنىڭ بارلىعىندا ەلدەگى ءتارتىپتىڭ دۇرىس ەمەس ەكەندىگىنىڭ ايقىن دالەلى. ايتسە دە، قاسىموۆ ءوزىنىڭ جىلى ورنىن بوساتا قويمادى.

ەرلان زامانبەكۇلى تۇرعىمباەۆ 1962 جىلى الماتىدا تۋعان.

زاڭ عىلىمدارىنىڭ كانديداتى (2004), پوليتسيا گەنەرال-مايورى. س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن (1984) زاڭگەر-قۇقىقتانۋشى ماماندىعى بويىنشا; ءال-فارابي اتىنداعى قازاق ۇلتتىق ۋنيۆەرسيتەتىنىڭ قارجى جانە نەسيە فاكۋلتەتىن (2003) ەكونوميست ماماندىعى بويىنشا بىتىرگەن. 1984 جىلدان - قاراعاندى وبلىستىق ءىىب ساران اۋدانىنىڭ ءىىب قىلمىستىق ىزدەستىرۋ بولىمشەسىنىڭ جەدەل وكىلى. 1986 جىلدان - الماتى قالالىق ءىىب الاتاۋ ءاىىب تەرگەۋ ءبولىمىنىڭ تەرگەۋشىسى، اعا تەرگەۋشىسى، تەرگەۋ ءبولىمى باستىعىنىڭ ورىنباسارى، ءىىبب باستىعىنىڭ تەرگەۋ جونىندەگى ورىنباسارى. 1993 جىلدان - الماتى قالالىق ءىىبب تەرگەۋ باسقارماسى باستىعىنىڭ ورىنباسارى. 1995 جىلدان - الماتى قالالىق ءىىبب كالينين ءاىىب باستىعى. 1996 جىلدان - الماتى قالاسى كالينين اۋدانى بويىنشا متك بب ءبولىم باستىعى. قر مەملەكەتتىك سالىق كوميتەتىنىڭ سالىق پوليتسياسى باس باسقارماسىندا سالىق تەرگەۋلەرى باسقارماسىنىڭ باستىعى. 1997 جىلدان - الماتى قالالىق ءىىبب تەرگەۋ باسقارماسىنىڭ باستىعى، الماتى قالالىق ءىىبب جەتىسۋ ءاىىب باستىعى، الماتى قالالىق ءىىبب باستىعىنىڭ تەرگەۋ جونىندەگى ورىنباسارى. 2000 جىلدان - قر ءىىم 9-شى دەپارتامەنتىنىڭ باستىعى. 2002 جىلدان - قر ءىىم كريمينالدىق پوليتسيا دەپارتامەنتىنىڭ باستىعى. 2003 جىلدان - سقو ءىىب باستاپ 2006 جىلدان - قر ءىىم تەرگەۋ كوميتەتىنىڭ توراعاسى. 2006 جىلدىڭ شىلدە ايىنان بەرى- الماتى قالاسىنىڭ ءىىد باستىعى.

“The Qazaq Times”