جامبىل وبلىسىندا جۇك پويىزى رەلستەن شىعىپ كەتتى – دەپ حابارلايدى "قازاقستان تەمىر جولى" كومپانياسىنىڭ ءباسپاسوز قىزمەتى.

كومپانيا مالىمەتىنشە، شىلدە ايىنىڭ 31-ءى كۇنى تاڭعى ساعات 8-05 شاماسىندا جامبىل وبلىسىنا قاراستى قاشقانتەڭىز-جاستار وتكەلىنىڭ مويىنتى – شىعاناق بولىگىندە جۇك پويىزى رەلستەن شىعىپ كەتكەن. توتەنشە جاعداي سالدارىنان قازىرگى تاڭدا بەس بىردەي جولاۋشىلار پويىزى بوگەلىپ تۇر. الدىن الا بولجام بويىنشا، جۇك ۆاگوندارىنىڭ رەلستەن شىعۋىنا ءبىر ۆاگوننىڭ جاناما راماسىنىڭ سىنۋى سەبەپ بولعان.

ەستەرىڭىزگە سالايىق، بۇعان دەيىن ماۋسىم ايىنىڭ 17-ءى كۇنى ءدال وسى جامبىل وبلىسىنا قاراستى سارىشاعان-شۋ تەمىرجول بولىگىندە الماتى-استانا باعىتىنداعى №9 جولاۋشىلار پويىزىنىڭ 20 ۆاگونى رەلستەن شىعىپ كەتىپ، سالدارىنان 23 ادام جاراقاتتانىپ، ءبىر ءجاسوسپىرىم كوز جۇمعان.

“The Qazaq Times”