الەۋمەتتىك جەلىلەردە جالعان اقپارات شىن ينفورماتسيانى ىعىستىرىپ شىعارۋدا. فوتو: REUTERS/BBC,.

ۇلىبريتانيا پارلامەنتىنىڭ قاۋىم پالاتاسىنداعى مادەنيەت، ءباسپاسوز جانە سپورت كوميتەتىنىڭ جاساعان رەسمي مالىمدەمەسىنە قاراعاندا، قازىرگى كەزدە تۇتاس الەمدە الەۋمەتتىك جەلىلەردە تاراعان جالعان مالىمەتتەر اسا جىلدام تارالىپ، شىنايى اقپاراتتاردى ىعىستىرىپ شىعارۋدا. اتالعان كوميتەت الەۋمەتتىك جەلى تۇتىنۋشىلارىنىڭ اقپاراتتىڭ شىن جالعانىن اجىراتا المايتىن دەڭگەيگە تۇسكەنىنەن الاڭدايدى. بۇل تۋرالى BBC حابار تاراتتى.

كوميتەت توراعاسى دەميان كوللينزدىڭ ايتۋىنشا، بۇل دەموكراتياعا ۇلكەن قاۋىپ توندىرەتىن ىستەردىڭ ءبىرى. سوندىقتاندا ول الەۋمەتتىك جەلىنىڭ يەلەرىنە جالعان اقپاراتپەن كۇرەسۋگە شاقىرعان. وسىدان بۇرىن بريتان ۇكىمەتى كەزكەلگەن اقپاراتتى الەۋمەتتىك جەلىگە العاش سالۋشى ادامعا تىركەپ، جەلىلەرگە بولىسىلگەن كۇندە دە اۋەلگى اۆتورعا سىلتەمەنى اۆتوماتتى تاباتىن باعدارلاما جاساۋدى ۇسىنعان. سول ارقىلى اۆتور ءوزى جاريالاعان اقپاراتقا جاۋاپتى بولادى.

كەيبىر توپتار ميلليونداعان اككاۋنتتاردى جالعان اقپارات تاراتۋعا پايدالانىپ، ونى اۋقىمدى ساياسي ماقساتتار ۇشىندە ىستەتكەنى تۋرالى مالىمەتتەردى جاريا ەتۋدە. ايتالىق، 2016 جىلعى اقش-تىڭ پرەزيدەنت سايلاۋىندا جانە "برەكسيت" كەزىندە جالعان اقپارات تاراتقان لوندوندىق كومپانيا ايىپتالۋدا. قازىرگى تاڭدا بريتان ۇكىمەتى الەۋمەتتىك جەلىنىڭ يەلەرىن وسى ماسەلە تۋراسىندا كەلىسسوز وتكىزۋگە شاقىرۋدا.

“The Qazaq Times”