قازاقستان پارلامەتىنىڭ تومەنگى پالاتاسى ءماجىلىسى قازاقستاندا فيليالى جوق الەۋمەتتىك جەلىلەر مەن مەسەنجەرلەردىڭ جۇمىسىن شەكتەيتىن زاڭ جوباسىن ماقۇلدادى. تومەنگى پالاتا دەپۋتاتتارى ماقۇلداعان قۇجات "بالا قۇقىقتارىن قورعاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى" دەپ اتالادى.  بۇل تۋرالى Vlast سايتى حابارلادى.

زاڭ جوباسىنا سايكەس، شەتەلدىك الەۋمەتتىك جەلىلەر مەن مەسسەنجەرلەر قازاقستان اۋماعىندا زاڭدى تۇلعا رەتىندە تىركەلىپ، فيليالىن اشۋعا ءتيىس. بۇعان قوسا، فيليالدى قازاقستان ازاماتى باسقارۋى كەرەك. بۇل ەرەجەنى ورىنداماسا، زاڭ جوباسى كۇشىنە ەنگەننەن كەيىن التى ايدان سوڭ جەلىلەر بۇعاتتالا باستايدى.

اقپاراتقا قاراعاندا، دەپۋتاتتار سونىمەن بىرگە ينتەرنەت-رەسۋرستاردى بۇعاتتاۋ ءتارتىبىن وزگەرتۋدى ۇسىنعان. ەگەر بۇرىن بۇل سوت شەشىمىمەن جۇزەگە اسسا، ەندى وكىلەتتى ورگاننىڭ شەشىمىمەن بۇعاتتاۋ قاراستىرىلىپ جاتىر.

اتالعان ۇسىنىس اۆتورلارى – دەپۋتاتتار دينا زاكيەۆا مەن ايدوس سارىم. دەپۋتاتتاردىڭ پىكىرىنشە، بۇل نورمالار كيبەربۋللينگەن كۇرەسىپ، بالا قۇقىعىن قورعاۋعا كومەكتەسەدى. سايتتىڭ حابارلاۋىنشا، دەگەنمەن سارسەنبى كۇنى زاڭ جوباسىن تالقىلاۋ كەزىندە دەپۋتاتتار بۇعاتتاۋ ماسەلەسىن اينالىپ ءوتىپ، بالالاردى قورعاۋ ماسەلەسىنە كوبىرەك نازار اۋدارۋعا تىرىسقان.

The Qazaq Times