يران اسا قۋاتتى ەكى اتوم ەلەكتر ستانتسياسىن سالۋدى قولعا الدى

ءبىر مەزگىل داۋ-جانجالسىز قالىپ قويعان – يران اتوم ماسەلەسى وسى جالدان باستاپ بۇۇ قاۋىپسىزدىك كەڭەسىنىڭ باس اۋىرتار ماسەلەسىنىڭ بىرىنە اينالماق. سەبەبى، يران اتوم قۋاتى ۇيىمىنىڭ توراعاسى كەلەسى جىلى بۋشەردە ەكى اتوم  ەلەكتر ستانتسياسىنىڭ قۇرلىسى باستالاتىنىن حابارلاعان. بۇنىڭ ارقايسىسى ەكى مىڭ مەگاۆاتت ەلەكتر ءوندىرۋ قۋاتىنا يە.

يران تەلەراديو ۇيىمى اقپارات اگەنتتىگىنىڭ حابارىنا قاراعاندا، يران اقۇ توراعاسى سالاحي  قۇرىلىس مىندەتىن ۇستىنە العان كاسىپورىندارمەن كەلىسىمشارت تا جاساسىپ، ءتىپتى، العاشقى ۇكىمەتتىك تولەمدەر دە اۋدارعان. الدىن الا تولەنگەن قارجى 185 ملن دوللاردى قۇرايدى. ونىڭ ايتۋىنشا: «جالپى كەلىسىمشارتتىڭ قۇنى 4 ملرد دوللاردى قۇرايدى. بۇل سوڭعى ەكى جىلداعى ەڭ ۇلكەن ونەركاسىپتىك كەلىسىمشارت سانالادى». ول تاعىدا بۋشەردە ءبىر رەاكتوردىڭ جۇمىس ىستەپ تۇرعانىن دا اتاپ ءوتتى. ال، جاڭا ستانتسيا قۇرلىسى ءۇشىن مىڭداعان يراندىق جانە شەتەلدىك ماماندار ۇسىنىس ەتىلمەك. بۇل ستانتسيا سالىنىپ بولعاسىن، وعان قاجەتتى جانارزاتتى قامداۋ ءۇشىن رەسەيمەن ارناۋلى كەلىسىمشارت جاساسقانىن دا جاسىرماعان.

الدا سالىناتىن ستانتسيا قۇرلىسى، رەسەي مەن يران اراسىنان جىك ىزدەپ وتىرعان اقش-تىڭ باستى نازارىندا بولاتىنىن داۋ تۋدىرمايدى. ال بۇۇ قاۋىپسىزدىك كەڭەسى وسىدان ءبىراز كۇن عانا بۇرىن، يراننىڭ ورتا ارالىقتى بالليستيكالىق زىمىران سىناعىن جاساعانىن جاريالاپ، سوعان ساي شۇعىل جينالىس اشىپ تالقىعا سالعان ەدى. يرانعا 2015 جىلى بەرىلگەن ەسكەرتۋ مەن كەلىسىم مازمۇنىن قاتاڭ ساقتاۋدى تالاپ ەتكەن. ەندى وعان اسا قۋاتتى ەكى اتوم ەلەكتر ستانتسياسى كەلىپ قوسىلسا، يران ماسەلەسى بۇۇ قاۋىپسىزدىك كەڭەسىنىڭ ماڭىزدى ىستەر كۇن تارتىبىنە قايتا ەنەيىن دەپ تۇر. ال امەريكا يراننىڭ اسكەري ىقپالىن السىرەتۋگە شارالار الىپ بارماق بولىپ وتىرعانى بەلگىلى. رەسەيدىڭ ورتا-شىعىستاعى وداقتاسىنا بۇۇ نەمەسە ناتو ارقىلى قانداي دا ءبىر قىسىمدار جاساۋعا تىرىسادى.

“The Qazaq Times”