Iran Atom elektr stanciyası. Foto: kernenergie.de

Bir mezgil dau-janjalsız qalıp qoyğan – Iran atom mäselesi osı jaldan bastap BWW Qauipsizdik Keñesiniñ bas auırtar mäselesiniñ birine aynalmaq. Sebebi, Iran Atom Quatı Wyımınıñ törağası kelesi jılı Buşerde eki atom  elektr stanciyasınıñ qwrlısı bastalatının habarlağan. Bwnıñ ärqaysısı eki mıñ megavatt elektr öndiru quatına ie.

Iran Teleradio wyımı Aqparat agenttiginiñ habarına qarağanda, Iran AQW törağası Salahi  qwrılıs mindetin üstine alğan käsiporındarmen kelisimşart ta jasasıp, tipti, alğaşqı ükimettik tölemder de audarğan. Aldın ala tölengen qarjı 185 mln dollardı qwraydı. Onıñ aytuınşa: «Jalpı kelisimşarttıñ qwnı 4 mlrd dollardı qwraydı. Bwl soñğı eki jıldağı eñ ülken önerkäsiptik kelisimşart sanaladı». Ol tağıda Buşerde bir reaktordıñ jwmıs istep twrğanın da atap ötti. Al, jaña stanciya qwrlısı üşin mıñdağan irandıq jäne şeteldik mamandar wsınıs etilmek. Bwl stanciya salınıp bolğasın, oğan qajetti janarzattı qamdau üşin Reseymen arnaulı kelisimşart jasasqanın da jasırmağan.

Alda salınatın stanciya qwrlısı, Resey men Iran arasınan jik izdep otırğan AQŞ-tıñ bastı nazarında bolatının dau tudırmaydı. Al BWW Qauipsizdik keñesi osıdan biraz kün ğana bwrın, Irannıñ orta aralıqtı ballistikalıq zımıran sınağın jasağanın jariyalap, soğan say şwğıl jinalıs aşıp talqığa salğan edi. Iranğa 2015 jılı berilgen eskertu men kelisim mazmwnın qatañ saqtaudı talap etken. Endi oğan asa quattı eki atom elektr stanciyası kelip qosılsa, Iran mäselesi BWW Qauipsizdik Keñesiniñ mañızdı ister kün tärtibine qayta eneyin dep twr. Al Amerika Irannıñ äskeri ıqpalın älsiretuge şaralar alıp barmaq bolıp otırğanı belgili. Reseydiñ Orta-Şığıstağı odaqtasına BWW nemese NATO arqılı qanday da bir qısımdar jasauğa tırısadı.

“The Qazaq Times”