قىرعىزستان پرەزيدەنتى سوورونباي جەەنبەكوۆ. فوتو: Knews.kg

سوورونباي جەەنبەكوۆ: «قىرعىزستانعا پارلامەنتتىك باسقارۋ جۇيەسى ساي كەلەدى» – دەپ مالىمدەدى.

ماۋسىم ايىنىڭ 27-ءى كۇنى پارلامەنت وتىرىسىندا ءسوز سويلەگەن قىرعىزستان پرەزيدەنتى سوورونباي جەەنبەكوۆ: «قىرعىزداردىڭ بولمىسىنا پارلامەنتتىك باسقارۋ جۇيەسى ساي. مەن قىرعىزستاندا پارلامەنتتىك دەموكارتيا ورناتۋدى كوزدەيمىن. ەلدە اۆتوريتاريزم ورناتۋ تالپىنىستارى جويىلۋى ءتيىس دەپ ەسەپتەيمىن» - دەپ مالىمدەدى.

سوورونباي جەەنبەكوۆ بيلىك باسىنا 2017 جىلدىڭ قاراشا ايىندا كەلگەن. وعان سايلاۋ كەزىندە سول كەزدەگى قىرعىزستان پرەزيدەنتى المازبەك اتامباەۆتىڭ ءوزى اشىق قولداۋ كورسەتكەن. سول ساتتە ساراپشىلاردىڭ باسىم كوپشىلىگى جەەنبەكوۆقا «اتامباەۆتىڭ ءىسىن جالعاستىرۋشى» - دەگەن باعا بەرگەن. بىراق جەەنبەكوۆ پرەزيدەنت بولىپ سايلانعان ساتتەن باستاپ ءوز ماڭايىن اتامباەۆ ادامدارىنان تازارتىپ، ساراپشىلار بولجامىن جوققا شىعارعان. وسىدان كەيىن ەل اراسىندا «اتامباەۆ پەن جەەنبەكوۆ اراسىندا بيلىك ءۇشىن تالاس ءجۇرىپ جاتىر» - دەگەن پىكىر قالىپساتقان. بۇل پىكىر ەكس-پرەمەر ساپار يساكوۆ جەمقورلىق ايىبى بويىنشا تەرگەۋگە الىنعاننان كەيىن ءتىپتى ۇدەي تۇسكەن.

“The Qazaq Times”