ءسۇريادا ءبىر اي ىشىندە 54 رەت قاندى قىرعىن بولعان

ادام قۇقىقتارىن قورعاۋ ۇيىمى ءسۇريادا ناۋرىز ايىندا بولعان قاقتىعىستاردان قازا بولعاندار سانىنا قاتىستى مالىمەتتەر جاريالادى. مالىمەتكە قاراعاندا، ناۋرىز ايىندا باشار اساد رەجيمى، رەسەي جانە YPG/PKK قارۋلى توپتارى قاتارلى تاراپتار 54 رەت شابۋىل جاساعان. سالدارىنان 783 جازىقسىز بۇقارا قازا تاپقان. بۇل تۋرالى «انادولى» اقپاراتتىق اگەنتتىگى حابارلادى.

حاباردا كورسەتىلۋىنشە ءبىر عانا ناۋرىز ايىندا قازا تاپقان 800-گە جۋىق ادامنىڭ 198-ءى بالالار، 138-ءى ايەلدەر. شىعىس گۋتاعا باعىتتالعان 40 رەتكى شابۋىلدىڭ 39-ى باشار اساد ۇكىمەتى جاعىنان جاسالعان. وسى مەرزىم ىشىندە جالپى ءسۇريا كولەمىندە رەسەي قارۋلى كۇشتەرى 4 رەت، YPG/PKK قارۋلى توپتارى 2 رەت، سۇرياداعى وزگە قارۋلى كۇشتەر 8 رەت شابۋىل جاساعان. ءار رەتكى شابۋىلدا ەڭ كەمىندە 5 بەيبىت تۇرعىندار قازا تاۋىپ وتىرعان.

ءسۇريا ادام قۇقىقتارى ۇيىمى باشار اساد رەجيمى جاعىنان جاسالعان شابۋىلداردى باسا ايىپتاپ، 142 بالا مەن 105 ايەلدى قامتىعان 620 بەيبىت تۇرعىننىڭ قازاسىن ارقالاعانىن ايتتى.

“The Qazaq Times”