ش.ايمانوۆ اتىنداعى «قازاقفيلم» كينوستۋدياسىنا ىسكەرلىك ماقساتتا تۇركيالىق «TRT» تەلەراديوكومپانياسىنىڭ استاناداعى  ديرەكتورى ابدۋلحاميت اۆشار كەلدى. كەزدەسۋدە كورپوراتسيا باسشىلىعى اتىنان كينوستۋديانىڭ كارتينالارىن تۇرىك تەلەارناسىندا كورسەتۋ ماقساتىندا الۋعا نيەتتى ەكەنىن ءبىلدىردى، -  دەپ حابارلايدى قر مادەنيەت جانە سپورت مينيسترلىگى.

«TRT» تەلەراديوكورپوراتسياسى – بىرنەشە راديوستانتسيالاردىڭ نەگىزىندە 1964 جىلى قۇرىلعان. بۇگىنگى تاڭدا كورپوراتسياعا ونداعان حالىقارالىق جانە ايماقتىق تەلە جانە راديو ارنالار كىرەدى. بۇل كومپانيانىڭ راديو جانە تەلە ارنالارى الەمنىڭ بىرنەشە تىلدەرىندە جۇرەدى. كوپتەگەن ەلدەردە وكىلدىگى بار كورپوراتسيانىڭ بولىمشەسى قازاقستاندا دا اشىلعان.

-ءبىزدىڭ «TRT Avaz» تەلەارناسى اپتاسىنا ءبىر رەت تۇركىتىلدەس ەلدەردىڭ كينولارىن كورسەتۋدى جوسپارلاپ وتىر. وسى ورايدا قازاقستانداعى ءتۇرلى جانرداعى كينو ءوندىرۋشى باستى ستۋديا «قازاقفيلمگە» كەلىپ وتىرمىز. باستى ماقساتىمىز — فيلمدەرىڭىز ارقىلى سىزدەردىڭ تاريحتارىڭىز بەن مادەنيەتتەرىڭىزدى كورسەتەتىن تۋىندىلاردى تاڭداپ الۋ، - دەدى كەزدەسۋ بارىسىندا ابدۋلحاميت اۆشار.

ءوز كەزەگىندە «قازاقفيلم» كينوستۋدياسىنىڭ اۋديوۆيزۋالدى جوبالار باسشىسى ولجاباي مۇسابەكوۆ كينوستۋديا وندىرگەن فيلمدەر كاتالوگىن بەرۋگە دايىن ەكەنىن جەتكىزدى:

- 2009 جىلعا دەيىن تۇسىرىلگەن فيلمدەر پلەنكادا ساقتالعان. الايدا قازاق عىلىمي-زەرتتەۋ مادەنيەت ينستيتۋتىنىڭ كومەگىمەن ساندىق جۇيەگە وتكىزدىك. ەسكى جانە جاڭا فيلمدەردى سىزدەرگە قاجەتتى فورماتتا بەرۋگە دايىنبىز.

كەزدسۋ بارىسىندا تۇركيالىق قوناققا كينوستۋديا بويىنشا ەكسكۋرسيا جۇرگىزىلىپ، «قازاقفيلمنىڭ» كينووندىرىستىك مۇمكىنشىلىگى جانە تەحنيكالىق جابدىعى تانىستىرىلدى.

“The Qazaq Times”