"قايراق قۇم" سۋ قويماسى.

قازاقستان تاجىكستانعا «قايراق قۇم» سۋ قويماسىنىڭ سۋىن ءتيىمدى پايدالانۋعا كومەكتەسپەك.

قازاقستان تاجىكستانعا «قايراق قۇم» سۋ قويماسىنداعى سۋدى ۇتىمدى پايدالانۋعا بايلانىستى قۇجات جىبەرگەن. تاجىكستان رەسپۋبليكاسىنىڭ ەنەرگەتيكا جانە سۋ رەسۋرستارى ءمينيسترىنىڭ ءبىرىنشى ورىنباسارى سۇلتان راحيمزودانىڭ سوزىنشە، قازاقستان «قايراق قۇم» سۋ قويماسىنىڭ سۋ رەسۋرستارىن ۇتىمدى پايدالانۋدا كومەك كورسەتۋدى ۇسىنعان. ونىڭ ايتۋىنشا، قازاقستانمەن قاتار وزبەكستان دا «قايراق قۇم» سۋ قويماسىنا قول ۇشىن بەرۋگە نيەت بىلدىرگەن جانە وسىعان بايلانىستى ارنايى جۇمىس توبى قۇرىلعان.

سۇلتان راحيمزودا اتالمىش ماسەلەگە بايلانىستى جۋرناليستەرگە بەرگەن سۇحباتىندا: «كەلىسىم تاجىكستاننىڭ سۋدى ساتۋىن بىلدىرمەيدى. قازاقستان مەن وزبەكستان جازعى ۋاقىتتا «قايراق قۇم» سۋ قويماسىندا سۋدى كوپ جيناقتاۋعا كومەكتەسەدى. بۇل ۇلكەن قارجىنى تالاپ ەتەدى. استانا مەن تاشكەنت بۇل قاراجاتتى تاجىكستانعا بەرۋگە دايىن »، - دەگەن.

تاجىكستان 2008 جىلعا دەيىن سۋ اعىنىن رەتتەۋدە قازاقستان جانە وزبەكستانمەن بىرلەسىپ جۇمىس ىستەپ كەلگەن. ەكى ەل دە سىرداريا سۋىن جيناۋعا قارجىلاي جانە تەحنيكالىق كومەك كورسەتكەن.

"قايراق قۇم" سۋ قويماسى تاجىكستاننىڭ سوعدي وبلىسى مەن وزبەكستاننىڭ فەرعانا وبلىسىنىڭ شەكاراسىندا ورنالاسقان. ول تاجىكستانداعى ەڭ ءىرى سۋ قويمالارىنىڭ ءبىرى. "قايراق قۇم" سۋ قويماسى سىرداريا وزەنىنىڭ اعىسىن رەتتەۋ ءۇشىن سالىنعان. ونىڭ قۇرامىنا سۋ بوگەتىنەن وزگە سۋ ەلەكترستانتسياسى كىرەدى. "قايراق قۇمعا" سۋدى تولتىرۋ كەڭەس وداعى تۇسىندا 1950 جىلى باستالعان.

“The Qazaq Times”