لاۆروۆ ورتالىق ازيا ەلدەرى جونىندە مالىمدەمە جاسادى

رەسەي سىرتقى ىستەر ءمينيسترى سەرگەي لاۆروۆ ورتالىق ازيا ەلدەرىنىڭ سوڭعى جىلدارداعى قارىم-قاتىناسى جونىندە مالىمدەمە جاسادى.

وزبەكستان استاناسى تاشكەنت قالاسىندا وتكەن اۋعانستان داعدارىسىن رەتتەۋگە بايلانىستى حالىقارالىق كونفەرەنتسيادا ءسوز سويلەگەن سەرگەي لاۆروۆ: «سوڭعى جىلدارى ورتالىق ازيا بەستىگىنىڭ (قازاقستان، وزبەكستان، قىرعىزستان، تۇركىمەنستان، تاجىكستان) قارىم-قاتىناسىندا جاڭا سەرپىلىس پايدا بولدى. بۇل ايماقتىق ماسەلەلەردى شەشۋگە عانا ەمەس اۋعانستان داعدارىسىن رەتتەۋگە دە جاقسى جاعىنان اسەر ەتۋدە. ءبىز اۋعانستان ماسەلەسىندە ورتالىق ازيا ەلدەرىنىڭ قادامدارىن جوعارى باعالايمىز» - دەگەن.

ەستەرىڭىزگە سالايىق، 15 ناۋرىز كۇنى استانا قالاسىندا ورتالىق ازيا ەلدەرى باسشىلارىنىڭ ءسامميتى وتكەن بولاتىن. اتالمىش سامميتەن كەيىن رەسەيلىك باق بەتتەرىندە «جيىندى ۇيىمداستىرعان قازاقستان مەن وزبەكستان رەسەيدەن الشاقتاۋدا»، «ورتالىق ازيا باسشىلارىنىڭ ءسامميتى قانداي دا ءبىر ينتەگراتسيالىق جوبالاردىڭ باستاماسى ەمەس»، «ورتالىق ازيا رەسەيدىڭ كومەگىنسىز ءوز ءوزىن قورعاي المايدى» - دەگەن سارىنداعى ماتەريالدار «جاۋىننان كەيىنگى ساڭىراۋقۇلاقتاي» قاپتاپ كەتكەن.

“The Qazaq Times”