نازارباەۆ: ورتالىق ازيا ماسەلەسىن شەشۋدە ءۇشىنشى تاراپ قاجەت ەمەس

قر پرەزيدەنتى نۇرسۇلتان نازارباەۆ ورتالىق ازيا ەلدەرىنىڭ باسشىلارىمەن ىسكەرلىك كەزدەسۋ باستالماي تۇرىپ، وزبەكستان، قىرعىزستان، تاجىكستان پرەزيدەنتتەرىمەن جانە تۇركىمەنستاننىڭ ءماجىلىس توراعاسىمەن ەكى جاقتى كەلىسسوز جۇرگىزدى.

"قازاقستانعا قوش كەلدىڭىزدەر(...). سوڭعى كەزدەسۋىمىزدەن كەيىن بارلىق ماسەلەلەر شەشىلۋدە، بىزدە "جول كارتاسى بار", ساۋدا جاقسارىپ كەلەدى. بولاشاقتا دا ءبارى جاقسى بولادى دەپ ويلايمىز", - دەدى نازارباەۆ قىرعىزستان پرەزيدەنتى سوورانباي جەەنبەكوۆپەن كەزدەسۋ كەزىندە.

پرەزيدەنتتىڭ سوزىنشە، بۇگىن بەس ەلدىڭ باسشىلارى تۇگەل كەزدەسىپ، ىشكى ماسەلەلەردى تالقىلايتىن بولادى.

"ولار ەكونوميكا، ينفراقۇرىلىم، لوگيستيكا جانە باسقا دا ماسەلەلەر. مۇنىڭ ءبارىن شەشۋگە ءبىزدىڭ مۇمكىندىگىمىز بولادى. ورتالىق ازياداعى ماسەلەلەردى شەشۋ ءۇشىن ءبىز ءۇشىنشى تاراپتى شاقىرمايمىز. ءبىز ءوز حالقىمىز ءۇشىن جاعداي جاساپ، ءوز ماسەلەلەرىمىزدى شەشۋ ءۇشىن كەزدەسىپ وتىرمىز. باسقا ماقساتىمىز جوق", - دەدى پرەزيدەنت.

سونداي-اق، قر پرەزيدەنتى وزبەكستان باسشىسى شاۆكات ميرزيەەۆپەن دە كەزدەستى.

"جىل ىشىندە ۇلكەن جۇمىس اتقاردىق. كورشىلەرمەن قارىم-قاتىناستى رەتتەدىك، ونداعان جىل بويى شەشىلمەگەن ماسەلەلەردى شەشتىك. ءتىپتى كوڭىل-كۇي دە وزگەردى", - دەدى ول.

ايتا كەتەيىك، بۇگىن استانا قالاسىندا ورتالىق ازيا ەلدەرى باسشىلارىنىڭ ءسامميتى باستالادى. بۇل باس قوسۋعا نۇرسۇلتان نازارباەۆ پەن شاۆكات ميرزيەەۆ باستاماشى بولدى.

“The Qazaq Times”