وڭتۇستىك كورەيانىڭ بۇرىنعى پرەزيدەنتى جەمقورلىق داۋىنا ىلىكتى

وڭتۇستىك كورەيانى 2009-2013 جىلدار ارالىعىندا باسقارعان پرەزيدەنت لي ميۋڭ باك (Lee Myung-bak) "بيلىگىن اسىرا پايدالاندى، پارا الدى" دەگەن كۇدىككە ءىلىندى. سارسەنبى كۇنى ول سەۋلدەگى ورتالىق پروكۋراتۋراعا تەرگەۋگە شاقىرىلعان. بۇل تۋرالى  "رەنحاپ" اگەنتتىگى حابارلادى. 

اگەنتتىك مالىمەتىنشە، لي ميۋڭ باك پرەزيدەنتتىك سايلاۋعا تۇسكەن كەزىندە جانە قىزمەتتە بولعان ءبىرىنشى جىلىندا "وڭتۇستىك كورەيانىڭ ۇلتتىق باقىلاۋ كوميتەتىنەن جانە Samsung كومپانياسى مەن باسقا دا كومپانيالاردان پارا تۇرىندە 11 ملرد ۆون (10,3 ملن دوللار) الدى" دەپ ايىپتالىپ وتىر.

سونداي-اق، ول اۆتوكولىك بولشەكتەرىن شىعاراتىن  DAS كومپانياسىنىڭ نەگىزگى يەسى بولۋى مۇمكىن، الايدا اتالعان كومپانيانىڭ قۇجاتتارى ونىڭ اعاسىنىڭ اتىنا تىركەلگەن. تەرگەۋ جۇمىسىنا قاراعاندا، لي ميۋڭ باك بۇل كومپانيانى ءوز اكتيۆتەرىن جاسىرۋ ءۇشىن پايدالانعان.

بۇدان بولەك، پروكۋرورلاردىڭ سوزىنشە، لي ءوزىنىڭ پرەزيدەنتتىك بيلىگىن اسىرا پايدالانعان. ال ەلدىڭ بۇرىنعى باسشىسى بولسا، بارلىق ايىپتاۋلاردى تەرىسكە شىعارىپ، بۇل "قازىرگى اكىمشىلىك بيلىكتىڭ ساياسي ارەكەتى" دەپ اتادى.

لي ميۋڭ باك – قىلمىستىق داۋعا قالعان وڭتۇستىك كورەيانىڭ ءتورتىنشى پرەزيدەنتى.  وڭۇستىك كورەيادا باسشىلىقتا بولعان 7 پرەزيدەنتتىڭ تەك ەكەۋى عانا قىلمىستىق جاۋاپقا تارتىلماعان.

ايتا كەتەيىك، بۇدان بۇرىن وڭتۇستىك كورەيانىڭ بۇرىنعى پرەزيدەنتى پاك كىن حەگە قاتىستى جەمقورلىق ءىسى قوزعالعان ەدى. 2017 جىلى ناۋرىزدىڭ 10 كۇنى وڭتۇستىك كورەيا كونستيتۋتسيالىق سوتىنىڭ شەشىمىمەن پاك كىن حە قىزمەتىنەن بوساتىلىپ، مامىردىڭ 9 كۇنى ەلدە پرەزيدەنت سايلاۋى ءوتىپ، مۋن جاين جەڭىسكە جەتكەن.

“The Qazaq Times”