وتكەن سەنبىدە، اقش پەن رەسەي پرەزيدەنتتەرى تەلەفون ارقىلى تىلدەستى. ءبىر ساعاتقا سوزىلعان تىلدەسۋدە دونالد ترامپ پەن ۆلاديمير پۋتين ەكى ەل قارىم-قاتىناسىن قالپىنا كەلتىرۋگە سەنىم ءبىلدىرىسىپ، اقش-رەسەي ديپلوماتياسىنىڭ جاڭا كەزەڭىن اشتى.  بۇل اقپاراتتى The New York Times حابارلاعان ەدى.

تىلدەسكەن ەكى تاراپ تەرروريزمگە قارسى تۇرۋ مەن ەكونوميكالىق سەلبەستىكتى كەڭەيتۋ جونىندە كەڭەستى. الايدا، ۋكراينا قايشىلىعى جايىندا ەكى جاق ورتاق پىكىرگە كەلە الماعان. سونىمەن قاتار، ەكى ەلدەگى شەندىلەردىڭ ايتىسىنا قاراعاندا، اقش-تىڭ رەسەيگە باعىتتاعان سانكتسياسىن الىپ تاستاۋ تۋرالى تالقى بولماعان. 2014 جىلى رەسەيدىڭ قىرىم ايماعىن اننەكتسيالاۋى، ۋكراينانىڭ شىعىسىنداعى سەپاراتيستىك سوعىستى قولداۋى، اقش-رەسەي اراسىن دەرلىك جاڭا قىرعي-قاباق قارىم-قاتىناسقا الىپ كەلدى.

حابارلاماعا نەگىزدەلگەندە، ترامپ پەن پۋتيننىڭ تىلدەسۋى ايتارلىقتاي ءساتتى وتكەن. پرەزيدەنت وباما تۇسىندا اقش-رەسەي قاتىناسى قايشىلىقتى كۇيگە وتكەن بولاتىن. ترامپ بۇل جاعدايدى وڭاۋعا تىرىسادى. ەكى ەل پرەزيدەنتتەرىنىڭ ۇزاق ءارى باياندى سۇحباتتاسۋى، ەكى ەلدىڭ قارىم-قاتىناسىنداعى جاڭا باستاماعا بالانىپ وتىر. ديالوگتان كەيىن اقش-رەسەي ىنتىماقتاستىعى جۇزەگە اسادى دەپ وتىر. بۇل ترامپ تاققا وتىرعاننان بەرى العاش رەت رەسەي باسشىسىنا قوڭىراۋ شالىپ سويلەسۋى.

بۇدان بۇرىنعى قۇراما شتاتتار مەن رەسەي اراسىنداعى شيەلەنىستى جاعدايلاردى ەسكە العاندا، ەكى ەل قاتىناسىنىڭ ايتارلىقتاي ۋشىعىپ تۇرعانى انىق ەدى. ايتالىق، اقش قاۋىپسىزدىك جانە بارلاۋ ورگانى الدەقاشان قورىتىندى شىعارىپ، رەسەي حاكەرلىك شابۋىلدار جانە باسقا دا ۇگىت قۇرالدارى ارقىلى ترامپتىڭ جەڭىسىنە بەلگىلى دارەجەدە سەپتىگىن تيگىزدى دەگەن بولاتىن. بىرنەشە رەتكى مالىمدەمەدەن كەيىن، بۇل شەشىمگە اقىرى، سول كەزدەگى پرەزيدەنتكە باستى ۇمىتكەر ترامپ كەلىسكەن ەدى. بارلاۋ اگەنتتەرى جانە دە وباما مەن ترامپقا رەسەيدىڭ كومپرومات ماتەريالداردى ۇستاپ وتىرعانىن دا مالىمدەگەن. كرەمل جاق ونى «فانتازيالىق اڭگىمە» دەگەن بولاتىن. سونىمەن قاتار، ەۋروپا مەن اقش رەسەيدىڭ ۋكرايناداعى ىستەرىنە قارسى بولىپ، سانكتسيا جاريالادى. وباما قىزمەتتەن كەتپەس بۇرىن، رەسەيلىك 35 ديپلوماتتى قۇراما شتاتتاردان قۋالاپ، رەسەيگە جاريالانعان ساكتسيانى كۇشەيتتى. سول ارقىلى اقش پرەزيدەنت سايلاۋىنا ارالاسقان رەسەيدەن كەك العان ەدى.

وسى جاعداياتتاردىڭ ءبارى ءبىر قوڭىراۋمەن شەشىلىپ كەتپەسە دە، اقش پەن رەسەي قاتىناسىنىڭ جاڭا بەينەسى قالىپتاساتىن تۇرى بار. وسىنىڭ ءوزى ترامپتىڭ پرەزيدەنتتىگىنەن بۇرىن جاساعان بولجامدارىمىزدىڭ دۇرىستىعىن راستاپ وتىر. الايدا، ديالوگ بارىسىندا رەسەيگە قاراتقان سانكتسيالاردى الىپ تاستاۋ ءىسى ءسوز بولماعان. بىراق، بۇعان ورىس شەندىلەرى: «پرەزيدەنتتەر ديالوگىندا كەڭەيتىلگەن ساۋدا-ەكونوميكالىق قاتىناس ورناتۋ ءىسى ءسوز بولدى، بۇل سانكتسيانىڭ الىنىپ تاستالاتىنىن بىلدىرەدى»، – دەپ ۇمىتتەنەدى.

“The Qazaq Times”