سىبايلاس جەمقورلىققا قارسى كۇرەس ۇلتتىق ءىس-قيمىل بيۋروسى وكىلدەرى ەنەرگەتيكا مينيسترلىگىنىڭ بىرنەشە لاۋازىمدى تۇلعاسىن ۇستادى. بۇل تۋرالى ۆەدومستۆونىڭ ءباسپاسوز قىزمەتى حابارلادى.

انىقتالعانداي، ۇستالعان ەنەرگەتيكا ۆيتسە-ءمينيسترى عاني سادىبەكوۆ  پەن "ايماق" جشس مەردىگەرلىك ۇيىمىنىڭ باسشىسى دۋانبەك د. بىرىگىپ، ششۋچينسك-بۋراباي كۋرورت ايماعىنداعى كولدى تازالاۋعا بولىنگەن اسا ءىرى كولەمدەگى بيۋدجەت قاراجاتىن جىمقىرعان.

"جەمقورلىق ىسىنە ەنەرگەتيكا مينيسترلىگىنىڭ دەپارتامەنت باسشىسى نۇربەكوۆ ج. مەن مەردىگەر كومپانيا وكىلدەرى جۇمالينوۆ س.، قادىربەرلين ب. قاتىسقان. سادىبەكوۆ قول قويعان جالعان اكتىلەر بويىنشا ەنەرگەتيكا مينيسترلىگى 2017 جىلى 3,6 ميلليارد تەڭگە تولەگەن. وسى سومادان  1 ميلليارد تەڭگەدەن اسا قاراجات قولما-قول تولەمگە اينالعان جانە جىمقىرىلعان", - دەپ مالىمدەدى بيۋرو وكىلى.

بۇدان بولەك، كولدى تازالاۋ ءۇشىن 2018 جىلعا بولىنگەن 1,5 ملرد تەڭگە دە جىمقىرىلعان.

"سادىبەكوۆ، نۇربەكوۆ، دۋانبەك، جۇمالينوۆ جانە قادىربەرلين ۇستالدى. سوتقا دەيىنگى تەرگەۋ جۇمىسى باستالعان", - دەدى بيۋرو وكىلى.

“The Qazaq Times”