تاجىكستاننىڭ ءبىلىم جانە عىلىم ءمينيسترى نۋريددين سايد ينتەرنەتتە ءوزىنىڭ اتىنا ايتىلعان سىندارعا جاۋاپ بەردى، دەپ حابارلايدى ورتالىق ازيا جاڭالىقتار قىزمەتى. 

الەۋمەتتىك جەلىلەردە ءبىلىم ءمينيسترى ورىس ءتىلىن جەتىك بىلمەيتىنى ءۇشىن سىنعا قالدى. ءباسپاسوز ءماسليحاتى كەزىندە نۋريدددين سايدتىڭ ورىس تىلىندە جۋرناليستەردىڭ سۇراقتارىنا جاۋاپ بەرىپ جاتقان بەينەكورىنىستەر الەۋمەتتىك جەلىگە تاراپ كەتكەن. ينتەرنەت قولدانۋشىلار بەينەتاسپانى كورىپ، ءبىلىم ءمينيسترىنىڭ وتستاۆكاعا كەتۋىن تالاپ ەتكەن.

ءبىلىم ءمينيسترىن قورعاۋشىلار دا كەزدەستى. ولار مەملەكەتتىك قىزمەتكەرلەر ەڭ الدىمەن تاجىك ءتىلىن ءبىلۋى شارت، قالعان ءتىلدى بىلۋگە مىندەتتى ەمەس دەيدى.

نۋريددين سايدتىڭ ءوزى بولسا، ورىس ءتىلىن وتە جاقسى بىلەمىن دەپ ەسەپتەيدى.

«مەن ارينە تولستوي، نە سولجەنيتسىن ەمەسپىن. بىراق ورىس ءتىلىن جەتىك بىلەمىن. مەن ورىس تىلىندە سويلەيمىن. ۇكىمەتتە باياندامانى ورىس تىلىندە جاسايمىن. مەن وسى تىلدە ەكى دوكتور مەن 8 كانديدات ازىرلەگەنمىن. وسىدان كەيىن سىزدەر مەنى ورىس ءتىلىن بىلمەيسىڭ دەپ ايىپتايسىڭدار ما؟...يا، مەندە اكتسەنت بار. بۇل كوپ ادامعا تيەسىلى»،- تاجىكستاننىڭ ءبىلىم ءمينيسترى.

نۋريددين سايدتىڭ سوزدەرىنشە، كوپتەگەن ءورىستىلدى حالىق تاجىك تىلىندە سويلەمەيدى.

تاجىكستاندا ورىس ءتىلى ەشقانداي مارتەبەگە يە ەمەس. ول تەك حالىقارالىق قاتىناس ءتىلى.

بۇعان ۇقساس جاعدايلار قازاقستاندا دا جوق ەمەس. مەملەكەتتە ورىس ءتىلى مەن قازاق ءتىلىن قولداناتىن ازاماتتار اراسىندا بولىپ جاتقان قايشىلىقتار ۇلكەن داۋعا اينالماسا دا الەۋمەتتىك جەلىدەردەن ءجيى كەزدەستىرۋگە بولادى.

“The Qazaq Times”