جاپاروۆ ورىس ءتىلىن رەسمي مارتەبەسىنەن ايىرۋ تۋرالى مالىمدەمە جاسادى

جاقىندا قىرعىزستان حالقى ورىس ءتىلىن رەسمي مارتەبەسىنەن الىپ، ونىڭ ورنىنا اعىلشىن ءتىلىن ەنگىزۋدى تالاپ ەتكەن. وسىعان بايلانىستى قىرعىزستان پرەزيدەنتتىگىنە ۇمىتكەر سادىر جاپاروۆ بۇل ماسەلەگە قاتىستى رەسمي مالىمدەمە جاسادى.

جاپاروۆ ءوزىنىڭ Facebook پاراقشاسىندا: «ۇسىنىس مۇلدە دۇرىس ەمەس. ورىس ءتىلى – بۇۇ تريبۋناسىندا قولدانىلاتىن التى ءتىلدىڭ ءبىرى. سونىمەن قاتار، بۇل حالىقتاردى بىرىكتىرەتىن جانە ءبىز عاسىرلار بويى قولدانىپ كەلە جاتقان ءتىل. ورىس ءتىلى مىندەتتى تۇردە رەسمي ءتىل بولىپ قالۋى كەرەك»، – دەپ جازدى.

2020 جىلى قازاندا رەسەيدىڭ قىرعىزستانداعى ەلشىسىمەن كەزدەسۋ كەزىندە سول كەزدە پرەزيدەنت مىندەتىن اتقارۋشى پرەمەر-مينيستر ساپار جاپاروۆ «ماسەلە كۇن تارتىبىندە تۇرعان جوق» دەگەن بولاتىن.

26 قاراشادا كونستيتۋتسيالىق كەڭەستىڭ مۇشەسى ساديردين توراليەۆ ورىس ءتىلىن رەسپۋبليكاداعى رەسمي ءتىل مارتەبەسىنەن ايىرۋ تۋرالى باستاما كوتەردى. بىراق بۇل باستامانى القالى ورگاننىڭ قالعان 79 وكىلى قولداماعان جوق.

قىرعىزستانداعى مەملەكەتتىك ءتىل – قىرعىز ءتىلى، ال ورىس ءتىلى رەسمي مارتەبەگە يە. بۇل نورما رەسپۋبليكا كونستيتۋتسياسىندا بەكىتىلگەن.

10 قاڭتاردا قىرعىزستاندا پرەزيدەنتتىك سايلاۋ وتەدى. وسىعان بايلانىستى 14 قاراشادا سادىر جاپاروۆ سايلاۋعا قاتىسۋ ءۇشىن ەل پرەزيدەنتىنىڭ جانە پرەمەر-ءمينيسترىنىڭ مىندەتىن اتقارۋشى قىزمەتىنەن كەتتى.

سونىمەن بىرگە كونستيتۋتسياعا وزگەرىستەر ەنگىزۋ تۋرالى رەفەرەندۋم وتكىزۋ جوسپارلانىپ جاتىر. قازىرگى ۋاقىتتا پرەزيدەنت لاۋازىمىنا 47 ادام ۇمىتكەر بولىپ وتىر.

ەلدە جاڭا كونستيتۋتسيا جوباسى قوعام تالقىلاۋىنا 17 قاراشادا شىعارىلعان. قۇجات پرەزيدەنتتىڭ وكىلەتى مەن ءرولىن ايتارلىقتاي ارتتىرادى. ەگەر تۇزەتۋلەر ماقۇلدانسا، قىرعىزستان ءىس جۇزىندە قازىرگىدەي پارلامەنتتىك ەمەس – پرەزيدەنت باسقارۋىنداعى رەسپۋبليكاعا اينالادى. بۇعان قوسا، قۇجات اۆتورلارى حالىق قۇرىلتايى اتتى كونسۋلتاتيۆتىك، ۇيلەستىرۋشى جاڭا ورگان قۇرۋدى ۇسىنىپ وتىر.

"The Qazaq Times"