فرانتسيانىڭ پورتتىق قالاسى كالەدە اۋعاندىقتار مەن ەريترەيالىقتار اراسىندا ورىن العان جاپپاي توبەلەس كەزىندە كەمىندە بەس ميگرانتقا وق ءتيىپ، جارالانعان. AFP اقپاراتتىق اگەنتتىگى 16-18 جاستاعى ءتورت ەريترەيالىق ازاماتتىڭ اۋىر حالدە اۋرۋحاناعا جەتكىزىلگەنىن حابارلادى. تاعى ون ءۇش ادام تەمىر سىرىقتاردان جارالانعانى بەلگىلى بولدى. بۇل تۋرالى ۆۆس اقپاراتتىق اگەنتتىگى جازدى. 

وقيعانىڭ قانداي سەبەپتەن وربىگەنى ءالى بەلگىسىز. ەكى ۇلت وكىلدەرىنىڭ اراسىنداعى قاقتىعىس ميگرانتتاردىڭ تاماق الۋعا ۇزىن-سوڭار كەزەكتە تۇرعان كەزىندە، تۇسكى ۋاقىتتا باستالعان. ەكى ساعاتقا سوزىلعان توبەلەس اۋعان ازاماتىنىڭ وق اتۋىنان باستالعان دەگەن اقپارات بار. تەكەتىرەسكە 200 ەريترەيالىق پەن 30 اۋعان ازاماتى قاتىسقان. كوپ ۇزاماي تەمىر سىرىقتارمەن قارۋلانعان ەريترەيا ميگرانتتارى قولدارىنا تاياق العان اۋعان جاستارىمەن ءوندىرىس ايماعىندا كەزدەسىپ، قويان-قولتىق توبەلەس باستالعان.

فرانتسيانىڭ ىشكى ىستەر ءمينيسترى جەرارد كولومب كالەگە ارنايى كەلىپ، قاقتىعىستىڭ الاڭداۋشىلىق تۋدىراتىن ماسەلە ەكەنىن اتاپ ءوتتى. رەسمي بيلىكتىڭ ايتۋىنشا، كالە قالاسىندا 550-600 ميگرانت بار. ال ۇكىمەتتىك ەمەس قايىرىمدىلىق ۇيىمدارى ولاردىڭ سانى 800-گە جۋىق دەپ كورسەتەدى. افريكا مەن اۋعانستاننان كەلگەن ميگرانتتاردىڭ كوزدەگەن نىسانى - ۇلىبريتانيا. ميگرانتتاردىڭ باسىم بولىگى - جاستار.

 “The Qazaq Times”