فوتو: Reuters

ميانما سوتى "مەملەكەتتىك قۇپيا تۋرالى" زاڭدى بۇزدى دەگەن ايىپپەن تۇتقىندالعان Reuters اقپاراتتىق اگەنتتىگىنىڭ قوس ءتىلشىسىن كەپىلدەمە بويىنشا بوساتۋدان باس تارتتى. 31 جاستاعى Wa Lone مەن 27 جاستاعى Kyaw Soe Oo وتكەن جىلدىڭ 25 تامىزىندا باستالىپ، 690 مىڭ روحيندجا مۇسىلمانىنىڭ بانگلادەشكە قونىس اۋدارۋىنا سەبەپ بولعان راكحاينداعى قاندى قاقتىعىس تۋرالى اقپارات بەرۋمەن شۇعىلدانعان. ولار جەلتوقسان ايىنىڭ 12 كۇنى پوليتسيا قىزمەتكەرلەرىمەن كەزدەسۋ ۇستىندە ۇستالدى. بۇل تۋرالى ءال-جازيرا اقپاراتتىق اگەنتتىگى جازدى. 

قوس ءتىلشىنىڭ ءوز تۋىستارىنا بولعان جايدى بايانداعان اڭگىمەسى بويىنشا، ولار مەيرامحاناعا كەلگەن بويدا بۇرىن كەزدەسپەگەن پوليتسيا قىزمەتكەرلەرى قولدارىنا بەلگىسىز قۇجاتتاردى ۇستاتقان. ارتىنشا پوليتسيا جاساعى كەلىپ، جۋرناليستەردى تۇتقىنعا العان. وقيعا ورنىندا بولعان پوليتسيا قىزمەتكەرلەرىنە جاۋاپتى تۇلعا Reuters تىلشىلەرىنىڭ قولىندا مەملەكەتتىك قۇپياعا جاتاتىن دەرەكتەر بولعانىن حابارلادى.

دەگەنمەن تىلشىلەردىڭ قورعاۋشىسى ايعاق ەسەبىندە تىركەلگەن قۇجاتتاعى دەرەك وسىعان دەيىن بىرنەشە جەرگىلىكتى اقپارات قۇرالدارىندا جاريالانعانىن ايتادى. ول ۇسىنعان دالەلدەرگە سايكەس، پوليتسيا "مەملەكەتتىك قۇپيا" دەپ تانىستىرعان قۇجاتتا راكحايننىڭ ماۋنگداۋ بولىگىندەگى اسكەري كۇشتەردىڭ ورنالاسۋى جازىلعان جانە بۇل تۋرالى ۇكىمەت  تامىز وقيعاسىنان كەيىن حالىقتىڭ الدىندا ەسەپ بەرگەن. "ياعني، قوعام ءۇشىن اشىق، بارلىعى بىلەتىن اقپارات  "مەملەكەتتىك قۇپيا" بولا المايدى", - دەيدى قورعاۋشى.

Reuters كومپانياسىنىڭ پرەزيدەنتى ستەفەن ادلەر جۋرناليستەردىڭ سەبەپسىز 50 كۇننەن استام ۋاقىت بويى اباقتىدا وتىرعانىن ايتىپ، ولاردى بوساتۋدى تالاپ ەتتى. بۇۇ-نىڭ باس حاتشىسى انتونيۋ گۋتتەرەش اتالعان جاعدايعا الاڭداۋشىلىق ءبىلدىرىپ، الەم ەلدەرىن تىلشىلەردى بوساتۋ ءۇشىن قولدارىنان كەلگەننىڭ ءبارىن جاساۋعا شاقىردى.

پوليتسيا قىزمەتكەرلەرى مەن جۋرناليستەردىڭ سوزدەرىندە بىرنەشە سايكەسسىزدىك بار. بىرىنشىدەن، قۇقىق قورعاۋ ورگانىنىڭ وكىلدەرى تىلشىلەردىڭ مەيرامحانادان تىس كوشە قيىلىسىندا قولعا تۇسكەنىن ايتىپ، ولاردىڭ "بەلگىسىز پوليتسيا قىزمەتكەرلەرىنىڭ شاقىرتۋىمەن تۇستەنۋگە كەلگەنبىز" دەگەن مالىمدەمەلەرىن جوققا شىعارادى. ەكىنشىدەن، جۋرناليستەر تۇتقىنداۋ توبىن باسقارعانى تۋرالى كۋالىك ەتكەن پوليتسيا باسشىسى وقيعا ورنىندا بولماعانىن ايتادى.

سوتتىڭ كەلەسى وتىرىسى 6 اقپانعا بەلگىلەندى.

“The Qazaq Times”