فوتو: AndroidInsider.ru

2017 جىلدىڭ 4 توقسانىندا Samsung Electronics كومپانياسى تاۋارلارىنىڭ ساتىلىمى شامامەن 61,8 ملرد دوللاردى قۇرادى، ال وپەراتسيالىق تابىسى - 14,2 ملرد دوللار. جىل باسىنان بەرى ساتىلىم كولەمى شامامەن 224,5 ملرد دوللار بولسا، وپەراتسيالىق تابىس 50,2 ملرد دوللارعا جەتتى. بۇل تۋرالى كومپانيانىڭ قازاقستانداعى فيليالىنان حابارلاندى. 

وتكەن جىلدىڭ ءتورتىنشى توقسانىندا كىرىستىڭ ارتۋى سەرۆەرلەر مەن ۇيالى قۇرىلعىلارعا ارنالعان جوعارى ساپالى جادى كومپونەنتتەرىنىڭ ارتۋىنا بايلانىستى بولعان.

سونداي-اق، كومپانيا جوعارى سەگمەنتتەگى سمارتفوندار ءۇشىن OLED-ەكراندى جەتكىزۋدى ارتتىرعان. الايدا LCD-پانەلدەرىنىڭ ساتىلىمى ازايعان.

كومپانيا مالىمەتىنشە، ماركەتينگتىك شىعىنداردىڭ ارتۋىنان ءموبيلدى بيزنەستە كىرىس تومەندەگەن. الدىڭعى توقسانمەن سالىستىرعاندا سمارتفونداردىڭ جالپى ساتىلىمى تومەنگى سەگمەنت جۇمىستارىن وڭتايلاندىرۋعا بايلانىستى ازايعان، الايدا Galaxy Note8 فلاگماندارىنىڭ ساتىلىمى كوبەيگەن.

كومپانيا 4 توقساندا ۇلكەن ەكراندار جانە QLED سىندى پرەميۋم مودەلدەردى ساتۋدان تۆ سەگمەنتىندە ايتارلىقتاي تابىس تاپقان. ال تۇرمىستىق تەحنيكا سالاسىندا كىرىستىڭ ارتۋى سولتۇستىك امەريكا مەن ەۋروپادا كىر جۋعىش ماشينالار مەن جوعارى دەڭگەيلى پەشتەرگە سۇرانىستىڭ ارتۋىنان بولعان.

كومپانيانىڭ بيىلعى جىلعا ارنالعان بولجامى دا جامان ەمەس. پرەميۋم قۇرىلعىلاردىڭ تانىمالدىعى سمارتفوندارعا دەگەن سۇرانىستى ارتتىرۋى مۇمكىن. سونداي-اق، Samsung كامەرا جانە Bixby داۋىس اسسيستەنتى سىندى نەگىزگى فۋنكتسيالارعا باسا نازار اۋدارماق.

“The Qazaq Times”