الەمدىك تەحنولوگيا الىپتارى قىتايداعى ءوندىرىسىن توقتاتتى

وسى اپتادا Samsung Electronics كومپانياسى باسەكە قىسىمىنا بايلانىستى قىتاي نارىعىنا ۇيالى تەلەفوندار شىعارۋدى توقتاتقانىن مالىمدەدى. اتالعان كومپانيا شىعىندى تەجەپ، تيىمدىلىكتى ارتتىرۋ ءۇشىن وسى قادامعا بارعانىن ايتادى.

Samsung كومپانياسى بۇعان دەيىن قىتايداعى زاۋىتتارىن جاپقان بولاتىن. سوڭعى ءبىر عانا زاۋىتى گۋاڭدۇڭ پروۆينتسياسىندا ورنالاسقان. كومپانيا قىتايداعى سوڭعى زاۋىتىنىڭ ءوندىرىسىن ماۋسىم ايىنان باستاپ توقتاتتى. دەگەنمەن، Samsung وسىعان دەيىن قىتاي نارىعىنا باعىتتالعان ونىمدەرىن ساتۋدى جالعاستىراتىنىن ايتقان.

اتالعان ەلەكترونيكا الىبى قىتايداعى زاۋىتتارىن جاپقانىمەن، ءۇندىستان جانە ۆەتنامداعى ءوندىرىسىن كەڭەيتۋدە. قىتايدا وندىرگىش كۇشتىڭ قىمباتتاۋى كوپتەگەن كومپانيالاردىڭ قىتايدان شىعىپ كەتۋىنە سەبەپ بولدى. قازىر ءىرى وندىرۋشىلەر وڭتۇستىك جانە وڭتۇستىك شىعىس ازيا ەلدەرىنە قاراي ويىسۋدا.

Counterpoint نارىقتىق زەرتتەۋ كومپانياسىنىڭ ايتۋىنشا، 2013 جىلى Samsung ونىمدەرى قىتاي نارىعىنداعى ۇقساس ونىمدەردىڭ 15 پايىزىن يەلەگەن. الايدا، قىتايدىڭ «حۋاۆەي» جانە Xiaomi سەكىلدى جەرگىلىكتى كومپانيالارىنىڭ دامۋى كورەيالىق ەلەكترونيكا الىبىن نارىقتان ىعىستىرا ءتۇستى. ال، بيىل نارىقتاعى سالماعى 1 پايىز عانا بولعان.

قىتاي نارىعىن زەرتتەگەن «سامسۋنگ» كومپانياسىنىڭ ماماندارى قىتاي نارىعىنىڭ، قىتايلىق تۇتىنۋشىلاردىڭ سۇرانىسى وتاندىق ارزان باعاداعى برەندتەر مەن Apple نەمەسە Huawei ماركالى جوعارى ساپالى ونىمدەرگە قاراي ويىسقانىن، سوندىقتان ەلدەگى ءوز ونىمدەرىنىڭ سۇرانىسى تومەندەگەنىن ايتادى.

قازىر، قىتايداعى جۇمىس كۇشىنىڭ قىمباتتاۋى، ەكونوميكالىق ءوسۋدىڭ باياۋلاۋى جانە اقش-قىتاي ساۋدا سوعىسىنىڭ اسەرىنەن كوپتەگەن ءىرى تەحنولوگيالىق كومپانيالار مەن ۇيالى تەلەفون وندىرۋشىلەرى ءوندىرىستى قىتايدان تىس جەرگە كوشىرۋدە.

تانىمال Sony كومپانياسى دا قىتايداعى سمارتفون زاۋىتىن وسى جىلدىڭ ناۋرىز ايىندا جاۋىپ، سمارتفون ءوندىرىسىن تايلاندقا اۋىستىردى. Apple كومپانياسى ءالى دە قىتايدا ۇيالى تەلەفونداردى وندىرۋدە. الايدا، ماۋسىم ايىندا اتالعان كومپانيا قىتايدان تەك 30 پايىز عانا ءونىمدى شىعاراتىنىن مالىمدەگەن ەدى.

“The Qazaq Times”