قايرات كەلىمبەتوۆ. فوتو: Tengrinews

قارجى ينستيتۋتتارىن قۇرۋ جانە ولاردىڭ جۇمىس ىستەۋى ءۇشىن الداعى ءۇش جىلدا بيۋدجەتتەن جىل سايىن 20 ملرد تەڭگە بولىنەدى. بۇل تۋرالى  "استانا" حالىقارالىق قارجى ورتالىعى (احقو) باسقارۋشىسى قايرات كەلىمبەتوۆ مالىمدەدى.

ء"بىز قارجى ينستيتۋتتارىن قۇرۋ جانە ىسكە قوسۋ ءۇشىن الداعى ءۇش جىل قاتارىنان بيۋدجەتتەن 20 ملرد تەڭگە الۋدى جوسپارلاپ وتىرمىز.  احقو ءوزىن 3-5 جىلدىڭ ىشىندە اقتاپ، ارى قاراي اتالعان سوما تومەندەيتىن بولادى. وسىدان كەيىن ءبىز بيۋدجەت قارجىسىنا تاۋەلدى بولماي، ينۆەستيتسيا تارتۋ مۇمكىندىگىن قاراستىرامىز. سونداي-اق، الداعى ءۇش جىلدا قازاقستانعا 3-5 ملرد دوللار پايدا اكەلەمىز دەپ جوسپارلانۋدا. بۇل ءبىزدىڭ پەسسيميستىك باعامىز. ال 10 جىل ىشىندە بۇل سومانى 40 ملرد دوللارعا جەتكىزۋدى جوسپارلايمىز", - دەدى كەلىمبەتوۆ،

بۇدان بولەك ول "ەير استانا" اۋە كومپانياسى، "قازاتومونەركاسىپ" ۇلتتىق كومپانياسى، "قازاقتەلەكوم"  SPO 2018 جىلدىڭ ءتورتىنشى توقسانىندا احقو الاڭىندا ءىرو-عا شىعارىلاتىنىن اتاپ ءوتتى.

كەلىمبەتوۆ كريپتوۆاليۋتا جۇيەسىنە قاتىستى دا پىكىر ءبىلدىردى.

"ساندىق تەحنولوگيالاردى قولدانۋعا ماماندار مەن ساراپشىلاردىڭ  قىزىعۋشىلىعى بار. ءبىز بۇل باعىتتى قولدايمىز. كەيبىر كومپانيالار  وسى باعىتپەن قازاقستاندا جۇمىس ىستەۋگە قىزىعۋشىلىق تانىتىپ وتىر. ال  ۇلتتىق كريپتوۆاليۋتانى شىعارۋعا كەلەر بولساق، بۇل پروتسەسس ءالى زەرتتەلىپ جاتىر، ەشكىم ناقتى شەشىم جاساعان جوق. بۇل ۇلتتىق بانك قۇزىرىنداعى نارسە", - دەدى ول.

كەلىمبەتوۆ سونداي-اق، Goldman Sachs ينۆەستيتسيالىق بانكى مەن Silk Road كومپانياسى احقو-عا ينۆەستور بولۋعا قىزىعۋشلىلىق بىلدىرگەنىن اتاپ ءوتتى.

ال "استانا" حالىقارالىق قارجى ورتالىعىن رەسمي تۇردە تانىستىرۋ 2018 جىلدىڭ 5 شىلدەسىنە جوسپارلانعان. بۇل كۇن استانا كۇنى جانە قر پرەزيدەنتى نۇرسۇلتان نازارباەۆتىڭ تۋعان كۇنىنە تۇسپا-تۇس كەلەدى.

“The Qazaq Times”