فوتو: dailynews.kz

2018 جىلعى 1 قاڭتارداعى جاعداي بويىنشا زەينەتاقى جيناقتارىنىڭ جالپى سوماسى 7,78 ترلن تەڭگەنى قۇرادى. ءسويتىپ 2017 جىلدىڭ باسىنان بەرى 1,1 ترلن تەڭگەگە ارتتى. ياعني، ءبىر جىل ىشىندەگى ءوسىم 16,4 پايىزدى قۇرادى. بۇل تۋرالى بجزق-نىڭ ءباسپاسوز كونفەرەنتسياسىندا ءمالىم بولدى. 

2018 جىلدىڭ 1 قاڭتارىنا قاراي شارتتاردىڭ بارلىق تۇرلەرى بويىنشا سالىمشىلاردىڭ (الۋشىلاردىڭ) جەكە زەينەتاقى شوتتارىنىڭ (جزش) سانى 10,12 ملن بىرلىك، ونىڭ ىشىندە مىندەتتى زەينەتاقى جارنالارى (مزج) ەسەبىنەن 9,64 ملن بىرلىك بولدى. مىندەتتى كاسىپتىك زەينەتاقى جارنالارىن (مكزج) ەسەپكە الۋ بويىنشا سالىمشىلاردىڭ (الۋشىلاردىڭ) جزش سانى 443 مىڭ بىرلىكتى، ال ەرىكتى زەينەتاقى جارنالارىن ەسەپكە الۋ (ەزج) بويىنشا - 39 مىڭ بىرلىكتى قۇرادى.

2017 جىلى زەينەتاقى جارنالارى بويىنشا تۇسىمدەردىڭ جالپى سوماسى 756,5 ملرد تەڭگە بولدى. زەينەتاقى جارنالارىنىڭ جالپى ءتۇسىمى ءبىر جىل ىشىندە 8,3 پايىزعا وسكەن. 2016 جىلدىڭ قورىتىندىسى بويىنشا بۇل كورسەتكىش 698,42 ملرد تەڭگەنى قۇراعان بولاتىن. مىندەتتى زەينەتاقى جارنالارى بويىنشا جارنالاردىڭ ورتاشا مولشەرى 15 078 تەڭگەنى قۇرادى.

2017 جىلى بجزق سالىمشىلارى مەن الۋشىلارىنىڭ جەكە زەينەتاقى شوتتارىنا ەسەپتەلگەن تازا ينۆەستيتسيالىق تابىس سوماسى 550,6 ملرد تەڭگە بولدى.قوردىڭ زەينەتاقى اكتيۆتەرىنىڭ تابىستىلىعى 7,92 پايىزدى قۇرادى. بۇل كەزەڭدە ينفلياتسيا دەڭگەيى 7,1 پايىز بولعانىن ەسكە سالامىز.

2017 جىلدىڭ قاڭتار – جەلتوقسان ايلارى ارالىعىندا بجزق-دان تولەنگەن زەينەتاقى تولەمدەرىنىڭ سوماسى 211,12 ملرد تەڭگە، ونىڭ ىشىندە ساقتاندىرۋ ۇيىمدارىنا جاسالعان اۋدارىمدار 26,06 ملرد تەڭگە بولدى. سالىستىرىپ قارايتىن بولساق، وتكەن جىلدىڭ سايكەس كەزەڭىندە قوردان 169,69 ملرد تەڭگە تولەنسە، ونىڭ ىشىندە ساقتاندىرۋ ۇيىمدارىنا جاسالعان اۋدارىمدار 22,69 ملرد تەڭگەنى قۇراعان. 2017 جىلى ورتا ەسەپپەن 1 ادامعا بەرىلگەن زەينەتاقى تولەمدەرىنىڭ سوماسى شامامەن 576,5 مىڭ تەڭگەگە جەتتى.

“The Qazaq Times”