فوتو: Altaynews.kz

2018 جىلى «نۇرلى جەر» باعدارلاماسى اياسىندا جەڭىلدەتىلگەن نەسيە بەرۋ ءۇشىن تۇرعىن ءۇي قۇرىلىس جيناق بانكىنە 24 ملرد تەڭگە بولىنەدى. 

اتالعان قاراجات باسىم باعىتتى رەسپۋبليكالىق ينۆەستيتسيالار تىزىمىنە ەندى جانە وسى جىلعى بيۋدجەت اياسىندا قاراستىرىلىپ وتىر. بۇل تۋرالى «قازاقستاننىڭ تۇرعىن ءۇي قۇرىلىس جيناق بانكى» اق («بايتەرەك» حولدينگىنىڭ ەنشىلەس ۇيىمى) ديرەكتورلار كەڭەسىنىڭ وتىرىسى بارىسىندا ايتىلدى. جينالىس استانادا «بايتەرەك» حولدينگىنىڭ باسشىسى ايدار ءارىپحانوۆتىڭ توراعالىق ەتۋىمەن ءوتتى، دەپ حابارلايدى بانكتىڭ ءباسپاسوز قىزمەتى.

«نۇرلى جەر» باعدارلاماسى بيۋدجەتتىك نەسيە تۇرىندە جىل سايىن بانككە 24 ملرد تەڭگە كولەمىندەگى قارجى ءبولۋدى قاراستىرادى. بۇل اقشاعا بانك سالىمشىلارى 5% كولەمىندەگى جەڭىلدەتىلگەن مولشەرلەمەمەن الدىن-الا جانە ارالىق زايمدار الا الادى. ول ءۇشىن تۇرعىن ءۇي قۇرىلىس جيناق بانكى شوتىندا 30% كولەمىندە ەڭ تومەنگى العاشقى جارنا جيناۋ قاجەت.

ءباسپاسوز قىزمەتىنىڭ مالىمەتىنشە، 2017 جىلدىڭ قورىتىندىسى بويىنشا تۇقجب مەملەكەت بولگەن 30 ملرد تەڭگەنى يگەرگەن. بۇل قارجىعا 3 488 قازاقستاندىق وتباسى «نۇرلى جەر» اياسىندا تومەن باعامەن ءۇي ساتىپ العان.

“The Qazaq Times”