Photo: Kapital.kz

جەكەشەلەندىرۋ بويىنشا "قازاقستاننىڭ تۇرعىن ءۇي قۇرىلىس جيناق بانكى" اق-نى  ساتۋ وسى جىلدىڭ سوڭىنا جوسپارلانىپ وتىر.  بۇل تۋرالى بۇگىن "بايتەرەك" ۇلتتىق باسقارۋشى حولدينگىنىڭ باسقارما توراعاسىنىڭ ورىنباسارى عالىمجان تادجياقوۆ ۇكىمەت وتىرىسى كەزىندە مالىمدەدى.

"تۇرىن ءۇي قۇرىلىس جيناق بانكىن جەكەشەلەندىرۋ ماسەلەلەرى بويىنشا كەلەسىدەي قادامدار جاسالدى: 2017 جىلدىڭ مامىرىندا ينۆەستور ىزدەۋ جانە كەلىسىمدى قولداۋ بويىنشا قارجى كەڭەسشىلەرىمەن كەلىسىم جاسالدى. كەڭەسشىلەردىڭ كومەگىمەن 420 پوتەنتسيالدى ينۆەستورعا  ينۆەستيتسيالىق ۇسىنىستاردى جەتكىزۋ بويىنشا ساۋال جىبەرىلدى.  ونىڭ ىشىندە 249-ى قىزىعۋشىلىق تانىتىپ، ناتيجەسىندە 2017 جىلدىڭ اياعىندا 14 پوتەنتسيالدى ينۆەستوردان قۇرالعان پۋل انىقتالدى. ولاردىڭ ىشىندە 7-ءۋى حالىقارالىق قارجى ينستيتۋتىنىڭ وكىلدەرى", - دەدى تادجياقوۆ.

ونىڭ سوزىنشە، ينۆەستورلار بانككە كەشەندى ساراپتاما جاساۋ جۇمىستارى باستالعان. "بۇل پروتسەستى 2018 جىلدىڭ شىلدەسىنە دەيىن اياقتاۋدى جوسپارلاپ وتىرمىز. تامىز-قىركۇيەك ايىنداعى ناتيجە بويىنشا قىزىعۋشىلىق تانىتقان سوڭعى ينۆەستورلاردان ناقتى ۇسىنىس الۋعا نيەتتىمىز", - دەيدى ول.

تۇرعىن ءۇي قۇرىلىس جيناق بانكى 2003 جىلى قۇرىلعان. بانك تومەنگى مولشەرلەمەمەن يپوتەكالىق كرەديت بەرۋ جانە تۇرعىن ۇيگە قاراجات جيناۋ باعدارلاماسىن ۇسىنادى. بانكتىڭ جالعىز اكتسيونەرى - "بايتەرەك" ۇبح. بانكتىڭ جەكەشەلەندىرىلەتىنى تۋرالى ەكى جىل بۇرىن ايتىلعان.

اتالعان بانكتىڭ جەكەشەلەندىرىلۋى ورىندى دا شىعار. الايدا وعان قانداي ينۆەستور كەلەتىنى، ونىڭ الداعى ۋاقىتتاعى قىزمەت ساپاسى قانداي بولاتىنى بىزگە بەلگىسىز. تەك بانك جەكە قولعا ءوتىپ، قاراپايىم حالىقتىڭ باسپانا ءۇشىن جيىپ-تەرگەنى جەلگە ۇشپاسا بولعانى.

“The Qazaq Times”