قر قورعانىس مينيسترلىگىنىڭ قارىزى كاسىپكەرلەردى شىعىنعا باتىرعان

"اتامەكەن"  ۇكپ كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى كۇرەس بويىنشا كەڭەس وتىرىسىندا مەملەكەتتىك ورگانداردىڭ زاڭعا قارسى ارەكەتتەرى تالقىعا سالىندى، دەپ حابارلايدى ۇكپ ءباسپاسوز قىزمەتى.

وتىرىس كەزىندە ءبىرىنشى ماسەلە بويىنشا ءمان-جايدى «اتامەكەن» قر ۇكپ كاسىپكەرلەر قۇقىعىن قورعاۋ دەپارتامەنتى ديرەكتورى ولەگ ساۆەلەنكو تۇسىندىرگەن. ونىڭ سوزىنشە، 2016 جىلدىڭ جەلتوقسان ايىنىڭ سوڭىنا قاراي  قر قورعانىس مينيسترلىگى كاسىپكەرلەرمەن  بۇرىن جاسالعان نەگىزگى شارتتار بويىنشا قوسىمشا كەلىسىمدەرگە قول قويعان.

"كەلىسىم بويىنشا 2017 جىلدىڭ قاڭتار ايىنان باستاپ اقپان ايىنا دەيىنگى كەزەڭدە، ياعني بايقاۋ پروتسەدۋرالارى شەشىلگەنشە، كاسىپكەرلەر اسكەري بولىمشەلەرگە اسكەري قىزمەتشىلەردى تاماقتاندىرۋعا مىندەتتەلدى. الايدا، قىزمەت كورسەتۋ جاسالعان سوڭ قر قورعانىس مينيسترلىگى ورىندالعان جۇمىس اكتىلەرىنە قول قويۋدان جانە كاسىپكەرلەرگە جاسالعان قىزمەتتەرى بويىنشا اقشا تولەۋدەن باس تارتتى، سالدارىنان بيزنەس قارجىلىق شىعىنعا باتىپ وتىر", – دەيدى ولەگ ساۆەلەنكو.

ال مەملەكەتتىك ورگان ءوزىنىڭ بۇل ارەكەتىن  شارتتىڭ قازىناشىلىق ورگانداردا ۋاقىتىندا تىركەلمەگەندىگىمەن تۇسىندىرەدى.

ۇكپ مالىمەتىنشە، وسىنىڭ سالدارىنان شارت تالاپتارى بۇزىلىپ، كاسىپكەرلەر ايتارلىقتاي قارجىلىق تىعىرىققا ۇشىراعان. قازىرگى تاڭدا شامامەن 200 ملن تەڭگە كولەمىندە شىعىنعا باتقان 11 شاعىن جانە ورتا بيزنەس سۋبەكتىسى جايىندا مالىمەت بار. وسى رەتتە كەلتىرىلگەن شىعىن قىزمەت كورسەتۋ بويىنشا تولەنبەگەن سومامەن عانا ەمەس، سونداي-اق قىزمەتكەرلەرگە ۋاقىتىندا ەڭبەكاقىنى بەرۋگە، سالىق تولەۋگە، نەسيە وتەۋگە دە كەدەرگى ەتىپ وتىر.

وسىلايشا استانا قالاسىنىعى ادۆوكاتتار القاسىنىڭ ادۆوكاتى مۇحتار قوجاحمەتوۆ استانا سوتىنىڭ كاسىپكەرلەردى قولداعانىن جەتكىزىپ، قازىناشىلىق ورگاندارعا جوعارىدا ايتىلعان ماسەلەگە نازار اۋدارۋ كەرەك ەكەنىن ايتتى سونداي-اق، ول وسىنداي ماسەلە بولماۋ ءۇشىن كەلىسىمدەردى تۇركەۋ بويىنشا ىشكى باقىلاۋدى نەمەسە باسقا پروتسەدۋرالاردى كۇشەيتۋدى ۇسىندى.

“The Qazaq Times"