شاۆكات ميرزيەەۆ قازاقستان اۋماعىندا اۆتوبۋستىڭ ورتەنۋى سالدارىنان كوز جۇمعان ازاماتتاردىڭ وتباسىلارىنا جاردەماقى تولەۋدى تاپسىردى - دەپ حابارلادى وزبەكستان پرەزيدەنتىنىڭ ءباسپاسوز قىزمەتى.

رەسمي تاشكەنت تاراتقان اقپارات بويىنشا، شاۆكات ميرزيەەۆ ەل ۇكىمەتىنە قازاقستاننىڭ سامارا-شىمكەنت تاس جولىندا ورتكە ورانعان اۆتوبۋستىڭ ىشىندە كوز جۇمعان 52 ازاماتتىڭ وتباسىلارىنا جاردەماقى تولەۋگە تاپسىرما بەرگەن. بىراق وزبەكستان پرەزيدەنتىنىڭ ءباسپاسوز قىزمەتى تاراتقان اقپاراتتا جاردەماقىنىڭ قانداي مولشەردە بولاتىندىعى جونىندە ەشقانداي مالىمەت كورسەتىلمەگەن. بۇعان دەيىن 20 قاڭتار كۇنى وزبەكستان سىرتقى ىستەر مينيسترلىگى كوز جۇمعان ازاماتتاردىڭ دەنەلەرى ەل اۋماعىنا ارنايى ۇشاقپەن جەتكىزىلگەندىگى جونىندە اقپارات تاراتقان.

ەستەرىڭىزگە سالايىق، قاڭتار ايىنىڭ 18-ءى كۇنى اقتوبە وبىلىسىنىڭ ىرعىز اۋدانىندا سامارا-شىمكەنت تاس جولىندا 57 ادام مىنگەن اۆتوبۋس ورتكە ورانعان بولاتىن. سالدارىنان كولىك ىشىندە بولعان 52 ادام وقيعا ورنىندا كوز جۇمعان. قۇقىق قورعاۋ ورگاندارىنىڭ مالىمەتىنشە، كوز جۇمعانداردىڭ بارلىعى وزبەكستان ازاماتتارى.

“The Qazaq Times”