تامارا دۇيسەنوۆا الماتىداعى كوندۋكتورلار ماسەلەسىن ءوزى باقىلاۋعا الماق

قر ەڭبەك جانە الەۋمەتتىك قورعاۋ ءمينيسترى تامارا دۇيسەنوۆا الماتى قالالىق اۆتوبۋستارىندا زاڭسىز جۇمىس ىستەپ جۇرگەن كوندۋكتورلارعا قاتىستى ماسەلەنى جەكە ءوزى قاداعالايتىنىن ايتتى. ءمينيستردىڭ سوزىنشە، بۇل ماسەلە ۇكىمەت دەڭگەيىنە دەيىن كوتەرىلگەن. 

"كوندۋكتورلاردىڭ ەڭبەك كەلىسىمى - بۇل بۇگىن ۇكىمەت وتىرىسىندا قارالعان ماسەلەلەردىڭ ءبىرى. ساۋال جۇرگىزۋ كەزىندە بۇل تۇلعالار ناقتى كوندۋكتور بولىپ ءجۇمىس ىستەيتىندەرىن، بىراق اقشالارىن كونۆەرتتە الاتىنىن، ەشقانداي قارجى اۋدارىمدارىن جاسامايتىندارىن ايتقان. بۇل ماسەلەنى مەن ءوز باقىلاۋىما الامىن، بىراق كەز كەلگەن ۇيىمدى تەكسەرۋ ءۇشىن ازاماتتاردىڭ ءوتىنىشى كەرەك", - دەدى دۇيسەنوۆا ۇكىمەت وتىرىسىنان كەيىنگى بريفينگتە.

ونىڭ سوزىنشە، ەڭبەك ينسپەكتسياسىمەن بىرگە جۇمىس بەرۋشىلەرگە "جەكە ەڭبەك كەلىسىمى جاسالماعان جاعدايدا اكىمشىلىك جاۋاپقا تارتىلاتىنى، ءتىپتى قىلمىستىق ءىس قوزعالاتىنى" تۋرالى ەسكەرتۋ جاسالۋ كەرەك ەكەن.

مينيستر تۇسىندىرگەندەي، ەگەر جۇمىس بەرۋشى  ەڭبەك كەلىسىمىن جاساماعان بولسا، الدىمەن جۇمىسشىلارىن الەۋمەتتىك كەپىلدىكتەن ايىرادى. ياعني جۇمىسشى جۇمىسسىز قالسا جۇمىسسىزدىعىنا قاتىستى بەرىلەتىن جاردەماقىدان، ال ايەل-كوندۋكتورلار بولسا دەكرەتتىك تولەمدەردەن ايىرىلۋى مۇمكىن.

"وسىعان بايلانىستى جۇمىس بەرۋشى جۇمىسشىلارمەن قالايدا كەلىسىم جاساپ ولارعا جالاقى تولەۋى كەرەك، ال ەگەر ولاردىڭ اۆتوبۋس پەن ترامۆايداعى جۇمىسىنا قاتىستى باسقاشا ۇسىنىسى بولسا ونى ءتۇسىندىرۋى ءتيىس", - دەدى دۇيسەنوۆا.

ايتا كەتەيىك، بۇدان بۇرىن الماتى قالاسى ماسليحاتىنىڭ دەپۋتاتى روزا باداەۆا قالا اۆتوبۋستارىنداعى كوندۋكتورلاردىڭ دورەكىلىگىمەن قوسا، اۆتوبۋس پاركتەرىندە "ۋاقىتشا جۇمىس ىزدەپ جۇرگەن كەز كەلگەن ادام جۇمىس ىستەيتىنى" تۋرالى ايتقان. ونىڭ سوزىنشە، كوندۋكتورلار جولاۋشىلارعا قىزمەت كورسەتۋگە قاتىستى كۋرستاردان ءوتىپ، زاڭدى جۇمىسشى رەتىندە تىركەلۋ كەرەك.

“The Qazaq Times”