قىراعى ۇلتتىق ۇلان جاۋىنگەرلەرى العىسقا بولەندى

 شىمكەنت قالاسى ازاماتتارىنىڭ قۇقىعىن قورعاۋ، ولاردى جول-كولىك وقيعالارىنان قۇتقارۋ جانە ءتۇرلى جايسىزدىقتار مەن كەلەڭسىزدىكتەردىڭ الدىن الۋدا قازاقستان رەسپۋبليكاسى ۇلتتىق ۇلانىنىڭ شىمكەنت قالاسىنداعى 6506 اسكەري ءبولىمىنىڭ الاتىن ورنى ەرەكشە.

بۇگىن اسكەري ءبولىم كومانديرىنە جولداعان حاتىندا قالا تۇرعىنى ابزالداەۆا سۇلۋشاش تاسبولاتقىزى ۇستىمىزدەگى جىلدىڭ 23 قاڭتارى كۇنى شامامەن ساعات 18:00 شاماسىندا، ب.مومىشۇلى كوشەسىنىڭ بويىندا ءوزىنىڭ دانيال ەسىمدى 4 جاسار نەمەرەسىنەن كوز جازىپ قالعانىن، ىزدەپ تاپپاعان سوڭ، 102 نومىرىنە تەلەفون ارقىلى پوليتسيا قىزمەتكەرلەرىنە جانە سول ماڭدا قىزمەتتە جۇرگەن 6506 اسكەري ءبولىمىنىڭ اسكەري جاساعىن كورىپ ولارعا دا بولعان ءمان-جايدى ايتىپ تۇسىندىرگەنىن، كوپ ۇزاماي قىزمەتتىك يت ارقىلى اسكەري قىزمەتشىلەردىڭ نەمەرەسىن تاۋىپ، وزىنە تابىستاعانىن ايتىپ، شەكسىز العىسىن بىلدىرگەن.

بولعان جايتتى ەستىگەن پاترۋل توبىنىڭ باستىعى سەرجانت جاقسىباەۆ ساپارجان جاقىپبەكۇلى جانە پاترۋلدەر قاتارداعى سەيسەنوۆ عالىمجان مەن قۇسايىنوۆ دانيار ءسابيدىڭ جاسىن، كيگەن كيىمدەرى مەن ەرەكشە بەلگىلەرىن سۇراپ جاتقاندا كينولوگيا قىزمەتىنىڭ مامانى سەرجانت قابىلبەكوۆ تەمىربەك ويلانباستان اپاسىنىڭ قولىندا قالعان ءسابيدىڭ شارفىن قىزمەتتىك يت «رالفكە» يىسكەتىپ، ونى شۇعىل تۇردە ىزگە سالادى. سول ماڭداعى اۋلالاردىڭ بىرىندەگى تەمىر گاراجداردىڭ ارتىندا جىلاپ تۇرعان بالانى جۇباتىپ، اكەلىپ سۇلۋشاش اپاعا كورسەتكەندە، قۋانىشتان اپاسى كوزىنە العان جاسىن جاسىرا المادى. «وسىنداي حالقىنا جۇمىلىپ، ەلىنە  ەزىلىپ، قىزمەت ەتەتىن  ۇلتتىق ۇلان جاۋىنگەرلەرىن ارقاشاندا بيىك كورەتىن بولدىم. اسكەري قىزمەتشىلەردىڭ تارتىپتىلىگىنە، ازاماتتارعا دەگەن سىپايىلىقتارىنا، ءوتىنىشىمدى جەرگە تاستاماي جاۋاپكەرشىلىكپەن قاراعانىنا، نەمەرەمدى امان-ەسەن تاۋىپ بەرگەنىنە ريزا بولدىم. وسىنداي ەلىمىزدىڭ قورعانى بولار جاۋىنگەرلەردى تاربيەلەپ وتىرعان 6506 اسكەري ءبولىم كومانديرىنە  العىسىم شەكسىز!»-دەدى.

«ەلىمىزدىڭ تىنىشتىعى ۇشىن اتقارىپ جۇرگەن قىزمەتىمدى ماقتان تۇتامىن. اسكەري قىزمەت – مەن ءۇشىن ماقتانىپ ايتۋعا لايىقتى ابرويلى قىزمەت!» - دەيدى كينولوگيا قىزمەتىنىڭ مامانى سەرجانت قابىلبەكوۆ تەمىربەك ءسابيتحانۇلى. سونداي-اق، ءوزىنىڭ سەنىمدى سەرىگى «رالفكە» دە العىسىن جاسىرمادى.

حالىققا كومەك قولىن سوزا بىلەتىن ۇلتتىق ۇلاننىڭ وسىنداي اسكەري قىزمەتشىلەرى امان بولسىن، ارقاشان ەلىمىزدە تىنىشتىق، تاتۋلىق ورناسىن، كوك تۋىمىز كوگىمىزدە جەلبىرەيبەرسىن!

6506 اسكەري ءبولىمىنىڭ كلۋب باستىعى كاپيتان جۇرىنباەۆ بەكاسىل امانسەيىتۇلى