فوتو: ريا نوۆوستي / كونستانتين چالابوۆ

رەسەي پرەزيدەنتى ۆلاديمير پۋتين  رەسەي ارقىلى  قازاقستان مەن قىرعىزستانعا ۋكراينادان تاۋار تاسىمالداۋعا تىيىم سالۋ تۋرالى جارلىققا قول قويدى. جارلىق 2018 جىلدىڭ 30 ماۋسىمىنا دەيىن كۇشىندە بولادى. بۇل تۋرالى ريا نوۆوستي اقپارات اگەنتتىگى حابارلادى. 

جاريالانعان قۇجات بويىنشا  رەسەي فەدەراتسياسى پرەزيدەنتىنىڭ 2016 جىلعى 1 قاڭتارداعى " رەسەي فەدەراتسياسى ارقىلى ۋكراينانىڭ  حالىقارالىق ترانزيتتىك جۇك تاسىمالىن قازاقستان رەسپۋبليكاسى نەمەسە قىرعىز رەسپۋبليكاسىنا وتكىزۋ كەزىندە رەسەي فەدەراتسياسىنىڭ ەكونوميكالىق قاۋىپسىزدىگى مەن ۇلتتىق مۇددەلەرىن قامتاماسىز ەتۋ شارالارى تۋرالى» قاۋلىسىنداعى "2017 جىلدىڭ 31 جەلتوقسانىنا دەيىن" دەگەن ءسوز "2018 جىلدىڭ 30 ماۋسىمىنا دەيىن" دەپ وزگەرىلگەن.

ايتا كەتەيىك، رەسەي 2016 جىلدىڭ 1 قاڭتارىنان باستاپ ەلدەگى كەدەندىك باج ستاۆكالارى مەن "سانكتسيالار" تىزىمىنە ەنگىزىلگەن تاۋارلارعا بايلانىستى ۋكراينانىڭ اۆتوموبيل جانە تەمىرجول  ترانزيتىنە تىيىم سالعان بولاتىن.

ال 2016 جىلعى 1 شىلدەدەن باستاپ رف پرەزيدەنتىنىڭ جارلىعىنا سايكەس، رەسەي اۋماعى ارقىلى ۋكراينادان قازاقستان مەن قىرعىزستانعا باراتىن تاۋارلارعا تىيىم سالىنعان. وسىدان كەيىن رەسمي كيەۆ رەسەيدى  "تەرريتوريادان وتەتىن ۋكراينالىق تاۋارلارعا توسقاۋىل قويدى جانە دسۇ ەرەجەلەرىن بۇزدى" دەپ ايىپتادى.

“The Qazaq Times”