قازاقستان روحيندجا مۇسىلماندارىنا گۋمانيتارلىق كومەك جىبەرەدى

قازاقستان ميانماداعى روحيندجا مۇسىلماندارىنا  500 ملن دوللار كولەمىندە گۋمانيتارلىق كومەك جىبەرەدى. بۇل تۋرالى شەشىمگە قر پرەمەر-ءمينيسترى باقىتجان ساعىنتاەۆ قول قويعان، دەپ حابارلادى Sputnik.

بۇل قاراجات قازاقستانداعى جانە باسقا ەلدەردەگى تابيعي جانە تەحنوگەندىك سيپاتتاعى توتەنشە جاعدايلارىن جويۋعا باعىتتالعان، وسى جىلى رەسپۋبليكالىق بيۋدجەتتە قاراستىرىلعان ۇكىمەتتىڭ شۇعىل رەزەرۆىنەن الىنادى. قارجىنى سىرتقى ىستەر مينيسترلىگى ارنايى بانكتىك شوتقا اۋدارماق.

بۇدان بۇرىن قازاقستان ميانماداعى جاعداي بويىنشا بۇۇ قاۋىپسىزدىك كەڭەسىنىڭ وتىرىسىنا قاتىسقان. وندا بۇۇ باس حاتشىسىنىڭ ساياسي ماسەلەلەر جونىندەگى ورىنباسارى دجەففري فەلتمان بۇۇ باسشىسىنىڭ بايانداماسىن تانىستىرعان. باياندامادا ايتىلعاندااي، ميانماداعى راكحاين شتاتىنداعى زورلىق-زومبىلىق دەڭگەيى تومەندەگەنمەن، بوسقىنداردىڭ اعىنى ءالى توقتاي قويماعان.

ايتا كەتەيىك، ميانماداعى روحيندجا مۇسىلماندارىنا باعىتتالعان قىرعىنشىلىق 25 تامىزدان باستالعان.  ميانما ۇكىمەتىنىڭ مالىمدەمەسىنە سىلتەمە جاساعان باسىلىمدارىنىڭ اقپاراتىنا سۇيەنسەك، ەلدەگى كەيبىر شاعىن يسلامدىق توپتار قاۋىپسىزدىك كۇشتەرىنە شابۋىل جاساعان. الايدا مۇنى ميانما ۇلكەن قىرعىنعا ۇلاستىرىپ جىبەرگەن.

“The Qazaq Times”