"قازاقستان شەكاراسىندا ءالى كۇنگە دەيىن باقىلاۋ بەكەتتەرى تۇر. قىرعىزستان تاسىمالداۋشىلارى ودان ءوتۋ ءۇشىن 600 مىڭ تەڭگە تولەۋى ءتيىس" – دەپ مالىمدەدى قىرعىزستان ىسكەرلىك قاۋىمداستىقتار ۇلتتىق اليانسى (ىقۇا) حاتشىلىعىنىڭ مەڭگەرۋشىسى ەلۆيرا بورومباەۆا.

جەلتوقسان ايىنىڭ 27-ءسى كۇنى ىقۇا وكىلدەرىنىڭ كاسىپكەرلەرمەن كەزدەسۋىندە ەلۆيرا بورومباەۆا قازاقستان مەن قىرعىزستان اراسىنداعى شەكارا داۋى جايىندا مالىمدەمە جاساعان. ول وندا: «سوڭعى رەت قازاق-قىرعىز شەكاراسىندا بولعان داعدارىس كوپتەگەن ماسەلەلردىڭ تۋىنداۋىنا سەبەپ بولعان. بيزنەسمەندەر وزدەرىنىڭ ءالسىز تۇستارىن ءبىلدى. بىراق بۇل ماسەلەلەردى شەشۋ ءۇشىن مەملەكەتتىك ورگانداردىڭ كومەگى قاجەت. ءبىز اقپارات سوعىسىندا جەڭىلىپ قالدىق. قازاقستان تاراپىندا بولعان زاڭ بۇزۋشىلىقتارعا ءبىزدىڭ مەملەكەتتىك ورگاندار ۋاقىتىندا جاۋاپ بەرە العان جوق. وسىنىڭ سالدارىنان قىرعىزستاندىق تاسىمالداۋشىلار زارداپ شەگۋدە. قازاقستان شەكاراسىندا ءالى كۇنگە دەيىن باقىلاۋ بەكەتتەرى تۇر. تاسىمالداۋشىلار ودان ءوتۋ ءۇشىن بۇرىن 300 مىڭ تەڭگە بەرسە، قازىر 600 مىڭ تەڭگە بەرەدى. ءبىز جاقىندا كەزەكتى سوتتا جەڭىلىس تاپتىق. بۇل جەردە بىزگە مەملەكەتتىك ورگانداردىڭ كومەگى قاجەت» - دەگەن.

ەستەرىڭىزگە سالايىق، جەلتوقسان ايىنىڭ 25-ءسى كۇنى استاناعا قىرعىزستان پرەزيدەنتى سوورونباي جەەنبەكوۆ رەسمي ءىس-ساپارمەن كەلگەن. ءىس-ساپار بارىسىندا ول نۇرسۇلتان نازارباەۆپەن كەزدەسىپ، قازاق-قىرعىز شەكاراسىن شەگەندەۋگە (دەليميتاتسيالاۋعا) بايلانىستى قۇجاتقا قول قويىپ، ستراتەگيالىق ارىپتەستىكتى ودان ارى دامىتۋ جايىندا كەلىسسوزدەر جۇرگىزگەن بولاتىن.

“The Qazaq Times”