Photo: express-k.kz

نۇرسۇلتان نازارباەۆ «مەن جەكە ءوز باسىم وسى ۋاقىتقا دەيىن ءبىر دە ءبىر رەت قىرعىزستان تاراپىنا جامان ءسوز ايتقان جوقپىن» - دەپ مالىمدەدى.

بۇگىن استانادا قىرعىزستان پرەزيدەنتى سوورونباي جەەنبەكوۆتى قابىلداعان نۇرسۇلتان نازارباەۆ كەزدەسۋ بارىسىندا قازاق-قىرعىز قارىم-قاتىناسى جايىندا اڭگىمە قوزعادى. ول وندا: «ءبىز ءسىزدى كۇتتىك. كەلگەنىڭىزگە قۋانىشتىمىز. قازاقستان تاراپى ءسىز باستاعان قىرعىزستان دەلەگاتسياسىنىڭ بارلىق سۇراقتارىن شەشۋگە دايىن. ءبىزدىڭ تاۋەلسىز ەل اتانعانىمىزعا 26 جىل بولدى. وسى ۋاقىت ارالىعىندا مەن ءبىر دە ءبىر رەت قىرعىزستان تاراپىنا جامان ءسوز ايتقان ەمەسپىن. بۇل دۇرىس تا. سەبەبى ءبىز كەلەمىز، كەتەمىز، ال ەكى ەل بىزگە دەيىن دە بولعان، بىزدەن كەيىن دە بولادى» - دەگەن.

ال سوورونباي جەەنبەكوۆ ءوز كەزەگىندە: «مەنى قازاقستانعا رەسمي ءىس-ساپارمەن شاقىرعانىڭىزعا ۇلكەن راحمەت ايتامىن. ۇشاق قونا سالىسىمەن ءبىزدى وتە جىلى قارسى الدى. مەن پرەزيدەنت بولىپ سايلانعانىمدا ءسىز ماعان قۇتتىقتاۋ حاتىن جولدادىڭىز. وسى ءساتتى پايدالانىپ مەن سىزگە راحمەت ايتقىم كەلەدى. ءسىز ءبىزدىڭ اقساقالىمىزسىز، ۇلكەن اعامىزسىز. قازاق پەن قىرعىز باۋىرلاس حالىق. ءبىزدىڭ جەرىمىز ءبىر، جولىمىز ءبىر. ءبىز ءبىر باستاۋدان سۋ ءىشىپ وتىرمىز. مەن ءبىزدىڭ ستراتەگيالىق ارىپتەستىگىمىزدى كۇشەيتۋ ءۇشىن بار كۇش-جىگەرىمدى سالامىن» - دەگەن.

ەستەرىڭىزگە سالايىق، بۇگىن قىرعىزستان پرەزيدەنتى سوورونباي جەەنبەكوۆ نۇرسۇلتان نازارباەۆتىڭ شاقىرتۋىمەن استاناعا رەسمي ءىس-ساپارمەن كەلگەن بولاتىن. بۇعان دەيىن ەكى ەل باسشىلارى قاراشا ايىنىڭ اياعىندا بەلارۋس استاناسى مينسك قالاسىندا كەزدەسكەن. اتالمىش كەزدەسۋدەن كەيىن قازاق-قىرعىز شەكاراسىنداعى داۋ شەشىلىپ، قازاقستان مەن قىرعىزستان كەدەن قىزمەتىن رەتكە كەلتىرەتىن «جول كارتاسى» قابىلدانعان.

“The Qazaq Times”