زەينەتاقى قورىنىڭ ينۆەستيتسيالىق كىرىسى ازايعانى ءمالىم بولدى

2017 جىلدىڭ باسىنان بەرى قازاقستاندىقتاردىڭ زەينەتاقى جيناقتارى 13,4%-عا ءوسىپ، قازان ايىنىڭ سوڭىندا 7,6 ترلن تەڭگەنى قۇراعان. بۇل تۋرالى Ranking ساراپتاما اگەنتتىگى حابارلاپ وتىر.

قازان ايىندا زەينەتاقى جيناقتارى 0,6% جانە 43,3 ملرد تەڭگەگە كوبەيگەن. وسى جىلى زەينەتاقى جيناقتارىنىڭ ەڭ كوپ مولشەرى تامىز ايىندا اۋدارىلعان نەمەسە 153,3 ملرد تەڭگە بولدى.

بىرىڭعاي جيناقتاۋشى زەينەتاقى قورىنا تۇسكەن تۇسىمدەر 10 ايدا 1,1 ترلن تەڭگەنى قۇرادى جانە بۇل 2016 جىلدىڭ وسى كەزەڭىمەن سالىستىرعاندا  19,5%-عا (181,4 ملرد تەڭگەگە) ارتىق. نەگىزگى تۇسىمدەر، ياعني 97%-ى مىندەتتى جارنالار مەن ينۆەستيتسيالىق اۋدارمالار ەسەبىنەن بولعان.

مىندەتتى جارنالار كولەمى 2017 جىلدىڭ قاڭتار-قازان ايىندا 584,8 ملرد تەڭگەنى قۇراعان جانە ءبىر جىل ىشىندە كورسەتكىش 48,7%-عا (191,5 ملرد تەڭگە) كوبەيگەن.

دەگەنمەن ينۆەستيتسيالىق كىرىس سوڭعى ەكى جىل قاتارىنان تومەندەگەن. وسى جىلدىڭ قاڭتار-قازان ايىندا ينۆەستيتسيالىق كىرىس 497,3 ملرد تەڭگە بولعان جانە 2016 جىلدىڭ سايكەس كەزەڭىنە قاراعاندا 2,4%-عا (12,1 ملرد تەڭگە) تومەن.

زەينەتاقى قورىنا تۇسكەن باسقا دا تۇسىمدەر جالپى ءتۇسىمنىڭ 3%-ىن قۇرايدى. ونىڭ ىشىندە مىندەتتى كاسىبي زەينەتاقى جارنالاردىڭ ۇلەسى 29,3 ملرد تەڭگە جانە 9,6%-دى قۇرايدى. ەرىكتى زەينەتاقى جارنا كولەمى ءبىر جىلدا 56,4%-عا نەمەسە 364,9 ملن تەڭگەگە دەيىن كوبەيگەن.

ايتا كەتەيىك، قاراشا ايىنىڭ باسىندا ءماجىلىس دەپۋتاتى ايقىن قوڭىروۆ زەينەتاقى جيناقتارىنىڭ كىرىسى تومەن ەكەنى جانە ونىڭ ءوسىمى ينفلياتسيا دەڭگەيىنەن تومەن ەكەنىن ايتقان. ونىڭ سوزىنشە، زەينەتاقى كىرىسى مەن ينفلياتسيا اراسىنداعى ايىرماشىلىق ۇلعايا بەرەدى.

بجزق سايتىندا جاريالانعان سوڭعى مالىمەتتەرگە قاراعاندا، زەيتەناقى جيناقتارىنىڭ كىرىسى  7,15%-عا تەڭ ال ينفلياتسيا كولەمى  ەسەپتىك كەزەڭدە 6,3% بولعان. الايدا زەينەتاقى كىرىسى ينفلياتسيادان تەك 0,85%-,ا ارتىق بولىپ وتىر.