اقش سەناتى جاڭا جوبانى بەكىتتى. فوتو: Senate.

ترامپ ۇكىمەتى كوپتەن بەرى ۇسىنىپ كەلگەن سالىق رەفورماسىن سەنات اقىرى ماقۇلدادى. بۇل قۇراما شتاتتىڭ سوڭعى 30 جىلداعى ەڭ ءىرى سالىق رەفورماسى بولىپ سانالادى. وسىعان دەيىن وكىلدەر پالاتاسى جاڭا جوبانى ماقۇلداماي كەلگەن. بۇل تۋرالى «The New York Times» باسىلىمىنىڭ رەسمي سايتى حابارلادى.

داۋىس بەرىپ ماقۇلداۋ كەزىندە 51 وكىل ماقۇلداپ، 48 وكىل جوباعا قارسى داۋىس بەرىپ، ءۇش داۋىستىڭ باسىمدىعىمەن سالىقتى قىسقارتۋ زاڭى قابىلداندى. داۋىس بەرۋ كەزىندە سەنات عيماراتىنىڭ الدىندا نارازىلىق شەرۋى دە بولدى. بۇل اقش-تىڭ وكىلدەر ۇيىندە ەڭ كوپ داۋ تۋدىرىپ، كوپ رەت تالقىلانعان تاقىرىپ ەدى. پارلامەنتتىڭ بەكىتۋىنەن كەيىن اتالعان ەرەجە اتقارىلاتىن بولسا، بۇل – پرەزيدەنت ترامپتىڭ زاڭ شىعارۋداعى ەڭ ۇلكەن تابىسى مەن جەڭىسى دەۋگە بولادى.

زاڭ جوباسىندا كورپوراتيۆتىك سالىقتى تابىستىڭ 35 پايىزىنان 20 پايىزىنا دەيىن تومەندەتۋ كەرەكتىگى ايتىلعان. وعان قوسا امەريكالىق كومپانيالاردىڭ شەتەلدەگى تابىسىن تولىعىمەن سالىقتان بوساتۋ تۋرالى قاراستىرادى. شەتەلدەن تابىس تاباتىن امەريكالىق كومپانيالاردىڭ ءبارى دەرلىك 2026 جىلعا دەيىن سالىق تولەۋدە جەڭىلدىكتەردەن  يگىلىكتەنە الادى.

اقش سەناتىنداعى دەموكراتتار پارتياسىنىڭ وكىلدەرى بۇل جوباعا بارىنشا قارسىلىق تانىتقان. سەناتتاعى دەموكراتتاردىڭ ليدەرى شاك شۋمەر سوزىندە: «مۇنداي جيىركەنىشتى زاڭ جوباسى ءۇشىن كەلەسى جولعى سايلاۋدا رەسپۋبليكاشىلدار جاۋاپ بەرەتىن بولادى. ولار بۇل جارامسىز زاڭ جوباسىنان وزدەرى-اق باس تارتاتىن بولادى. ءتىپتى سول ءۇشىن داۋىس بەرۋدەن ۇيالاتىن بولادى»، – دەگەن.

جوباعا قارسى شىققانداردىڭ كوبى جاڭا جوبا قابىلدانسا وسىعان دەيىن سالىق تولەۋ ءۇشىن قاراستىرىلعان Obamacare پروگرامماسىنداعى مىندەتتى ساقتاندىرۋدان ايىرىلىپ قالادى دەپ قارايدى. كونگرەستىڭ بيۋدجەت بويىنشا باسقارمالارى جۇرگىزگەن زەرتتەۋ بويىنشا، جاڭا جوبا ساقتاندىرۋ اقىلارىنىڭ جوعارلاۋىنا الىپ كەلەدى، 2027 جىلعا بارعاندا 13 ملن ادام ساقتاندىرۋدان قاعىس قالادى.

“The Qazaq Times”